O sepela o ebela le lefase,
O re lefase le boima
O tšea dipheto tše fošagetšego,
O re bophelo bo boima
O ratana le basadi ba lesome,
O re basadi ga ba loka
O ratana le banna ba lesome,
O re banna ga ba loka
O roga ngwaneno,
O re batho ba go hloile,
O nyatša batswadi,
O re batho ba ya go loya
O tšwafa go šoma,
O re Modimo ga a go rate
O nagana tša bošilo,
O re wena ga wa rutega
O romilwe ke mang?
O tlogela bophelo,
O kgetha go rwala lefase
Lefase ke le legolo,
Ga o tsebe magomo a lona
Naa lefase le boima?
Le role ga se la gago
Naa bophelo bo boima?
Bo rwale ke bja gago
Tlogela go rwala tša ba bangwe,
O ka se di rwale ka moka wa di kgona
Šoma ka maatla,
O tla tseba lerato
Nagana tše botse,
O tla rutega
Dumela go rongwa ke bophelo bja gago,
Bo tla go tlela le tše dibotse
Rwala tše boleta,
O tla khutša go imelwa.