O mofenyi re go rolela kefa Mmago batho,
Re a go reta ga ešita le hlompho e go swanetše,
Leo re go bonago ka lona leihlo ke la go ba mogale gare ga bagale,
Gobane o mofenyi o fentše mapheko le meleko,
O mofenyi o fentše Bokubu le Bokwena kua madibeng a matala,
O tsene gona ka kgang le mereba wa boa o šikere gauta,
Ke ra morwetšana yo mosehlana boka senakangwedi,
O rile go mo hlosola mo lefaseng ra tia mekgolokwane,
E le ge re go reta ka gore o mma mmelega lesea,
O belege ngwana dithama tša mabusebuse,
O belege seroto ka diatleng tša sona,
Re tla khutša go ja bogobe bja baagišani
Gobane pitša o tlo e phethola,
Re letile le tšona ditlogolo
Ka ge a tla nyalwa ke ngwana wa kgoši.