Mologadi, yena mma wa go tswala nna

Mosadi gare ga basadi

Yena wa nnete wa go swara thipa ka bogaleng

Wa go nthwala dikgwedi tše senyane ntle le go belaela

Ke a go leboga ka kgodišo yeo o nkgodišitšego ka yona

O wele o tsoga ka rena Mologadi

Wa ipotša gore gare ga dipula le meoya

O tlo phela o na le nna, o ntwetše Tjali ya Moraswi

Wa lwela le bona bana ba gešo

Wa dira bonnete bja gore re tsena sekolo ka moka go fihla marematlou

Wa se fele pelo ge re fela re e wa tseleng,

Wa re Maleka ga se makgona, makgona ke maboeletša

Lehono ke a tseba gore thuto e bohlokwa mma

Ebile le mafotwana aka ke nyaka moo ke gatilego gona ba fete

O bogale bjalo ka tau, gare ga mahloko le matshwenyego wa re baka bana ke tlo ba thekga go ya go ile

Wa ipotša gore le ge o le motswadi o le noši

O ikgoga ka letolo seo re se nyakago

O tla se phethagatša

Dibotse di a go swanela Mologadi

Ga e se be rena fela, hlohleletša le ba bangwe Tjali