Mzindini wohlong’ oluNtsundu!
Amasi abekw’elangeni umpothulo uyangcangcazela,
Ifikile imin’ibikade ixelwa, de yaxhanyulwa sisizukulwana sikaQamata.
Yintsholo yani na le kweli leMpumakolini?
Ngomani le niyigwijayo na makwedini?
Tshotsho nibekho makwedini satsho nathi sadla inyama,saqongqotha umongo sawuthoba ngomabila ebanda
Makwedini kudala nintyiloza nisenza intsholo okwamatshontso ekhangela isikhukhukazi
Makwedini mbuleleni uMongameli weSizwe
Makwedini yithani camagu kwiiNkosi neeKumkani zeliphondo
Kaloku inkunzi zamadada ebezikade zingqulunyulwe amaphiko
Namhlanje ziyanduluka
Lugcobo nochulumanco kumama notata
Bubusi kwisithili nakwii Nkonde neeNkodekazi zasekuhlaleni
Abanye bavuyela inyibidyala izibiliboco zenyanga Yomnga
Kambe abanye bavuma ingoma
Bayaxhentsa bayatyityima bayaqula
Kukhala ikhaba ekhohlo nasekunene
Iyatsho intsholo ngasemva kuvunywa ingoma “Wenjenje umntu ozale inkwenkwe”
Kambi abanye bethu bathi Yeha-a-aa!!
Ukuzala kukuzelula
Yeyakoweth’ imaz’ eyathi yazulazula,
Yazuza ngentlazane yade yazala,
Amankonyane abonwa ngawenyama
Kant’ eneneni ngamathole oomthonyama
Athiywa ke la makhwenkwe ngoonina
Ebikwa ke ona ngokwananiselana
Amabhongo abo enziwa ngenkabi zebhokhwe
Ubulawu bembeleko yamakhwenkwe.
Makwedini ndlela-ntle nihambe nibuye.
Kaloku nina nizigqibile inkukhu zabantu ngobusuku borhatya
Kaloko eli lisiko, isithethe kunye nenkcubeko yakwaNtu
Ngaloo mazwi aningabokuqala yaye aningabokugqibela nto nje kutshitsha izinto namaxesha
Ngoku sikwixesha elibi yaye elixhalabisayo kumaphondo onke eli loMzantsi Afrika.
Ngoke ke bazali bethu nani ziiNkosi zethu
Icekwa lilele kuni ukuba niqinise isandla nenze kangangoko niqhele ukwenza khona ukuze amaphondo
Angatsibi ilitye likaphungela atyeshele umqulu nomgaqo-siseko ebekiweyo
Kaloku nina nibekwe ngokuthenjwa kwaye nonyulwe ngokubonwa into yokuba ningumtya nethunga nenyaniso yaye ke anihleki nokuba ayihlekisi
Nkunz’ ezabekwa ngob’ zazalwa!
Nina niphath’ amathokazi ngokwaziwa
Ke kaloku nina ningamathole omgquba
Niyazaz’ izithebe zenu zomgquba.
Owu! Bona abazali xabenxibe isiXhosa bexhentsa nje ngamaXhosa
Kunxitywe imibhaco kufakwe iinxili emagxeni, kubethwe iminkqayi,
Kubhiyozelwa ukubuya konyana
Ubave besithi “Hala-la-laa! Hala-la-laa! Abuya amadodana”
Kuwu! Ndlela-ntle makwedini umhla weshumi elinesixhenxe ufikile kwinyanga Yomnga siphefumla phezu kwayo.
Satsho sahamba kakuhle kobubusuku,
Saphumla kwintlonti yabaxholovane.
Satsho sanoBhuti abatsha
*ISISELE SENYATHI*