Bohle re lokologile, re imologile
Re tlemolotšwe, re na le maphego
Re tla fofafofa, ra namologa
Melomo ya kgona go phephešwa
Re na le tša rena ditokelo
Dira tša go thabiša ya gago pelo
Ithute o je Sejahlapi, o itirele
Ikapeše mmele, o ikgantšhe
Ikamogele, o itšweletše setšhabeng
O na le tša gago ditokelo tša motheo
Thabiša ya gago pelo
O le mosadi, šoma ka natla ka bosadi
O na le tokelo ya go tsena mejako yohle
O le monna, se dulele tlaišo boka nku
O na le tokelo ya go ntšha sa mafahleng
O le mogolofadi, nontšha kgopolo ka thuto
O na le tokelo ya go ithuta