Go tswa koga looe … Lesea gale fetsa go tsalwa le beolwa tlhogo go ntshiwa moriri wa ntlha wa kgolo ya lona morago ga setsetsi sa ga mmaagwe go tlosa mogopolo wa lesea ko lefatsheng leo le tswang ko go lona go kgontsha lesea gore le ungwele lego nonofa ka mogopolo yo moswa mo lefatsheng le lesha le moriri yo moswa.

Morago ga seo re bitsa leseanyana le re re ngwana kaga le ungwelwa lego swatoga kwa tlholegong ya lona le gola ebile le tia go amogela botshelo jo bosha ka ditoro tse diswa le moriri yo moswa yoo eleng thata ya lona goya botsofeng le losong.

Ngwana yo pele ga a teiwa leina go lebelelwa tlholego ya gagwe le sebaka sa botshelo jwa gago jwa tlholego le tsotlhe tse di amanang le go nna teng ga gagwe jaaka ngwana fela ga ese ena fela go lebelelwa le botshelo jwa batsadi ba gagwe.

Go botlhokwa go tlosa moriri yo wa lesea mme se se botlhokwa thata ke gore o isiwa kae…. O golaganngwa mmogo le khujana ya lesea fa le fetsa go diga mme morago di latlhelwe koo go se kitlang go nna bonolo gore di fitlhelelwe ka ntlha ya gore ele tsona di tshwereng botshelo jwa lesea le jwa mmaalona.

Ga ese khupamarama gore moriri o kotsi go tlalatlala le tikologo ke tshedimosetso e e botlhokwa ebile e namatsha go ela tlhoko seo se golaganngwang le seriri sa motho gaa tlholega lwantlha mo lefatsheng.

Se se re ruta gore mo pading ya sedumedi monna yoo a neng ana le maatla ka ntlha ya moriri a bitswa Samson ene ele ka ntlha ya eng fa ane a tsaya thata yotlhe mo moriring wa gagwe, re lemoga fa thuto eo ene e re ruta go boloka moriri wa rona le go ela tlhoko koo o latlhelwang gona.

Go jesa monate thata go utlwa fa yo mongwe a re ngwana wa mosetsana o tlhalefa ka bonako ebile botoka thata gona le wa mosimane ke ka ntlha ya poloko le kgodiso ya moriri mo baneng ba basetsana fela seo ele moila mo basimaneng gonne ba tshwanetse ba lebege lego ithuta go natlafala ntle le moriri ka gona le tumelo ya gore otla diegisa matshelo a bona fa batla o godisa ga ba ka tlhola ba tshopana le ona eleng seo se tshwanetseng basetsana fela go ya ka ngwao.

Se se re tlisa mo thutong ya ngwao boswa re lebeletse ikatisothuto ya sekolo sa Setswana seo se bitswang BOGWERA koo bana ba basimane bayang go ithutela bonna le go ikatisetsa bona ntle le kgodiso ya moriri. Ke ka moo ba tlang ba phatsima diphogwana ba lebega bale bantle ka ditebego tsa bonna le bonatla.

Moriri mo ngwaneng wa Moaforika ke khumo le maatla fela tumelo tse di farologaneng di tla kgatlhanong le thuo ya ona thata, segolo kafa letlhakoreng la bana ba basimane, dingwe tsare osa ipeolela moswi mmago fela motsala eleng mmago fa o sale lesea o ipeoletse ena…. Re ganetsa eng ebile re dumela eng?

Re tlhoka go itse le go tlhaloganya gore moriri ke leungo la peo yaga mmago ka ona o jara sefoka sa botshelo le loso, lefifi le lesedi, phitlhelelo le timelo moriri yo o golaganya botshelo jwa mme le lesea go tswa koga looe.

Ntlha ke gore o aparetse kakanyo le botlhale o sireleditse phogwana le kgotswana ebile ka ona o ka lebega wa bitswa lekau,yo mongwe lekgarebe gwa ntlafala tebego gwa totobala fa ole mojaboswa yoo matshwanedi goya ka tshwao la ona ebile o kase latlhege.

Moriri le nna nkase o tlose gonne kesa batle go timelela bagaetsho ke batla go utlwa kago tlhaba ga ntlha tsa ona gore gaabo motho musi wa sebi wa kua tshika kopana borwa ngwana wa motswana ke utlwa ekare nka ingwaa tlhogo tlhororo ya wela fatshe.

Basadi ba kile ba kua mokgosi bare monna ntlhabe ka tedu eseng thipa e buang tshipa phologolo tsa thabathupa.

Moriri dula le nna se swatoge tlhogo yaka ga se  ke swelwe ke mme !!