Sefatanaga se ile sa ema pele ga keiti ye hwibidu. Seresanta Moleko o ile a theoga gomme a notlolla keiti, a le mogaleng. Reneilwe o be a kgona go kwa gore o be a foraforetša mosadi wa gagwe ka mesepelo ya gagwe. bjale ka mehleng. O be a mmotša gore o sa tšwa go fihla hoteleng, ebile o ile go kopana le bašomimmogo ka yena ka phapošing ya khomferentshe.

Reneilwe o ile a segela ka pelong ka kgegeo, a lebeletše ngwakwana wa phapoši tše nne wa RDP woo o bego o le ka pele ga bona, a ipotšiša ge eba mosadi wa gagwe o tseba ka ga wona. Ngwako woo e be e le lona lepatlelo la bona go tloga mola ba thomago go ratana.

Ge e le gore ka nnete ba be ba tloga ba ‘ratana’. Go Reneilwe seo e be e se go ratana le ga tee. O be a no mo lefa ka ge a be a mo hlokometše gammogo le ba lapa la gabo. Go be go sena maikutlo ka gare; nakong e ntši o be a ipona molato ka seo a bego a se dira.

Eupša gabjale Reneilwe o be a ekwa pefelo e ruthetša sehuba sa gagwe ge a tsena ka ngwakong, Seresanta Moleko a etile pele ka merwalo ka matsogong a gagwe ka moka, mola a athile mokotlana wa Reneilwe wa sekolo legetleng. O ile a di lahlela godimo ga disofa tše di hwibidu tša velvet gomme a tšhuma thelebišene.

“Mafelelong ra ba ra fihla. Ebile le ngwako wo ga o na matšhila bjale ka ge re o hweditše la mafelelo, ka moya wola. Nke o kwe fela gore go homotše bjang mo.” Seresanta Moleko o ile a realo, a ithekga sofeng mola letsogo la gagwe le gokere magetla a Reneilwe, a mo pinyeletša ka maatla.

Reneilwe ga se a bolela selo. O be a sa befedišitšwe ke seo se diregilego mabenkeleng morago mola Tembisa. O be a fela a ipotšiša ge eba Shawn o tla hlwela a sa mmolediša gape. Go tla diragala eng ge eba o be a hlakantšhitše tee le pedi gomme a lemoga seo se bego se direga magareng ga gagwe le lephodisa leo? O ile a kwa pelo ya gagwe e fofela godimo mogolong wa gagwe ka kgopolo yeo. Meokgo e ile ya benya mahlong a gagwe, e le ge a rapela gore seo e se be therešo.

O be a duma go leletša Shawn, go kwa lentšu la gagwe fela, eupša goba gona ga lephodisa leo gwa thatafatša dilo.

“O nagana eng? O se ke wa mpotša gore o sa befetšwe ka baka la seo se diregilego ka mošemane yona wa setlaela,” Seresanta Moleko o ile a realo, a phophola sefahlego sa Reneilwe se boreletšana ka bokantle bja menwana ya gagwe ye mebedi ye megolo.

Reneilwe o ile a sekhumula, sefahlego sa gagwe se retologetše kgakala. “Mmm! Le ke lefelo la rena. Re tlile mo go tla go ipshina, e sego go lwa, babes.” O ile a homola lebakanyana, a bogetše TV. Go be go na le pego ka dithulaganyo tšeo di bego di dirilwe ke maphodisa tša go thiba ditsela mafelelong a beke yeo. “Na o ka thabela sa go nwa? Ke nagana gore go na le juice ka mola foretšini. Ke e tlogetše la mafelelo ge re be re le mo. Nna ke nyaka piri ya go tonya thwee!”

“Nna ke swerwe ke tlala. Ke nagana gore ke thome go apea. Go na le dijo, akere?”

“Ee. Ga gona motho yo a ilego a tla mo go tloga mola re sepelago. Morapedi o be a ile Krugersdorp. Wa mo tseba yola,” o ile a myemyela. “O rata dijo kudu. Ke ka moo a dumetše go hlokomela lefelo le. Go ja grocery ya ka ka moka. Ke a ipotšiša gore afa le grocery yona o a e reka ka mola mokhukhung wa gagwe na.”

Reneilwe o ile a gapeletša myemyelo gomme a emelela, a lebile ka khitšhining. Moleko o ile a mo latela gomme a bula setšidifatši, a ntšha tšhitswana ya bjala.  O ile a ithekga ka setšhidifatši, a lebeletše Reneilwe yoo a bego a bula diraka, a nyakana le seo a ka se apeago.

“Babes, o a tseba gore ke go rata bjang mara? Ga ke nyake le go nagana ke go lobile bakeng sa mošemanyana fela wa sekolo wa setlaela. E le gore o bona eng go mošemanyana yena yola? Ga a bonale a etšwa ka lapeng la bahumi. Gape go molaleng gore o ile go o petšha ka pocket money. Na ke seo o se nyakago seo? Go lahla tše ka moka – ka lebaka la R5 ya lešidišidi ka break?” O ile a sora piri ya gagwe ka myemyelo.

Reneilwe o ile a duma eke a ka mmotša ka moo Shawn a tšikiditlago pelo ya gagwe ka gona. Ka moo a ikwago eke o pharataeseng ka gona dinako ka moka ge Shawn a mo kgwatha. Eupša go feta moo o be a duma go ka mo tsebiša gore yena ga a kgathale ge eba Shawn o na le tšhelete goba aowa – eupša o be a tseba gore seo se tla gafiša Moleko.

Ka ge a be a tseba ka moo monna yoo a bego a tlala pelo ka pela ka gona, le gore o be a sa dikadike go ntšha sethunya ge a befetšwe, Reneilwe a boloka dikgopolo tšeo tša gagwe sehubeng.

“Ga gona seo se diragalago magareng ga rena. Ke go boditše, mos,” o ile a realo, a betla ditapola.

“Ke kgolwa gore o mpotša nnete, ngwanenyana. Esego bjale, e tla ba mafelelo a lena le le babedi. Ke šetše ke lobile kudu ka wena. Ga gona ka moo nka go tlogelago o sepela. O wa ka wena. Ga gona monna yoo a tla go kgomago. Esego ke sa phela. Ka fao, tlogela go iphora.”

Mantšu ao a go tonya a ile a tšhoša Reneilwe. O ile a rogaka letšatši leo a kopanego le monna yoo ka lona. Letšatši leo a mo filego mmele wa gagwe. Letšatši leo a amogetšego dimpho tša go bitša tšeo a mo reketšego tšona go mo gokagoketša mapaing.

Pelo ya Reneilwe e be e sa tsorotla madi ka mehla ge a be a gopola letšatši leo la pele. E be e le ngwaga wa go feta, dikgwedi morago ga gore tatagwe a bethwe ke seterouku, ge a be a sa tšo swara mengwaga ye 16.

Seresanta Moleko o be a phela a etela tatagwe a na le mogatša’agwe. A thoma go tla a le nosi, a enwa digalagala tša go bitša gammogo le tatagwe, pele a hlaselwa ke bolwetši. Ka pejana, o ile a fetoga malome wa gagwe go feta moagišane. O be a bile a bitša tatagwe “groot man” yeo e rago gore ‘mogolo wa ka’ mola Radillo yena a mmitša “moratho”.

Radillo o be a sa belaele ge a bona lephodisa leo le iša bana ba gagwe toropong go yo ba rekela diaparo, gobane a bona yena le MaMoleko bjale ka lelapa. Sister Moleko le Radillo ba be ba sa kgolwe gore Seresanta Moleko a ka dira Reneilwe tša phaku. Ba be ba le bjalo ka bagwera ba selapa.

“Ke a kgopela, George. O netefatše gore ga a kitimi ka morago ga bašemane. Ke nyaka a fetša sekolo gomme a be mooki bjalo ka mosadi wa gago … goba yona ngaka. Go tseba mang? Gape bana ba ka ke bana ba gago. Ge etšwa tseleng, o se ke wa dikadika go ba betha. O ba bontšhe tsela,” Reneilwe o ile a gopola ge tatagwe a be a botša Seresanta Moleko. Mantšu ao a ile a dira gore a mo tshepe bjalo ka tatagwe wa bobedi.

Ka letšatši le lengwe a mo iša toropong, a le noši. A fihla a mo rekela tšohle tše a bego a di nyaka: diaparo, sellathekeng le dijo. Ya ba o mo iša Orange Farm. Ge a mmotšiša gore ba ya kae, o ile a mo foraforetša ka gore ba yo etela mamogolo wa gagwe.

Ge ba fihla, a mmotša gore a thekge ditho. O ile a tšwa lebakanyana gomme a boa ka morago ga iri a swere setena sa di R200. O ile a foša mašeleng ao godimo ga tafolana gomme a dula sofeng, thoko ga Reneilwe. Reneilwe o be a sa tšhogile, ge a bona tšhelete yeo ye ntšintši. O ile a ipotšiša gore o e tšere kae le gore ke ya go dira eng.

“Ke eng?” Seresanta Moleko o ile a botšiša, ge a bona a tomotše mahlo. “Ke mathomo o bona tšhelete ye kaakaa?”

Reneilwe o ile a dumela ka hlogo, a tlaetše.

“Gona o swanetše go phela le nna, sesi. Tšhelete ye ka moka e kaba ya gago. Gabotsebotse nka o fa yona mafelelong a kgwedi ye nngwe le ye nngwe. Nagana gore o ka dira eng ka yona. Mmm? Mafelelo a kgwedi ye nngwe le ye nngwe.”

Mathomong, Reneilwe o be a sa kwešiši gore go diragala eng. Ke moka pelo ya gagwe ya nyaka go ema ge monna yoo a tliša letsogo la gagwe gomme a thoma go mo porašaporaša meriri. O ile a ikgogela morago, ka dihlong.

“O se ke wa tšhoga. O mosadi bjale, mos? O a mensetereita akere? O a tseba gore mensetereišene ke eng?” O be a ile a botšiša, a mo lebeletše ka mahlo a go se kwešišege, a le gare a latswalatswa melomo. Reneilwe o ile a tšhoga le go feta.

“Aowa, Malome Moleko,” o ile a goa, e le ge a be a mo latswa lerameng.

“Argh! Tlogela go raloka dipapadi wena, man!” O ile a mo šobatha molala gomme a mmetha ka tladimolongwana ka kgang.  Reneilwe o be a ile a lla, a leka go phonyokga diatleng tša monna yoo, eupša a mo phetla ka maatla.

“O be o ipshina ka mašeleng a ka? Bjale ke nako ya go ntefa, mosetsana. O be o nagana eng? Gore ke nna Morena Jesu? Ke no fana ka tšhelete ntle le lebaka? Tlogela bogafi, wena?” o ile a bela, a bea sethunya sa gagwe godimo ga tafolana.

Reneilwe o ile a kwa teng ya gagwe e fofela godimo mogolong wa gagwe ge a thoma go mo phophola dirope ga bonolo … goba go fihla ge seatla sa gagwe se subelela ka tlase ga rokwana ya gagwe ya matšobatšoba. O ile a leka go mo kgorometša le go goa, eupša a mmotša gore a itshware ge e le gore ga a nyake go hwa, a mo supetša sethunya.

Ge a bona thoboro e dutše moo godimo ga tafolana, Reneilwe a mo tlogela gore a dire se sengwe le se sengwe seo a se ratago ka mmele wa gagwe. Dilo tšeo di ilego tša dira gore a ikwe a tšhilafetše; a tlaišitšwe.

Ge a bona ka mo a bego a swenyegilego ka gona, Seresanta Moleko o ile a tshepiša go mo hlokomela gammogo le ba lapa la gabo. O ile a re ke seo kgarebe ye nngwe le ye nngwe ya go lekana le yena e swanetšego go se dira, le gore yena o mahlatse ka ge a lobile bokgarebe bja gagwe go monna wa maikarabelo bjalo ka yena.  Motho yoo a tla dulago a mo hlokometše; esego go mošemanyana fela yoo a bego a tla mo imiša gomme a tšhaba.

“Tšea. E go swanetše,” o ile a realo, a mo fa mapampiri a mabedi a di R100. “Go sana le ye ntši yeo e tlago ge fela o ka swara sephiri sa rena. I’m going to spoil you rotten, girl.” Moleko o be a ile a tshepiša. “Le gona, batho ba tla no go sega ge ba ka tseba ka se. Ba tla go bitša ka mainaina. O a tseba, mos?”

Reneilwe o be a tseba gore o nepile. O be a tseba gore Sister Moleko o be a tla bela ge a ka hwetša gore o robetše le monna wa gagwe gomme ka nnete, ya ba sephiri sa bona, goba go fihla lehono. Go be go le boleta go se swara gobane bohle bao ba bego ba ba bona mmogo ba be ba no gopola gore ke moagišane wa mmakgonthe fela, yoo a hlokometšego morwedi wa mogwera wa gagwe.

Moleko o be a ile a kgonthišiša gore o dira tšohle ka hlokomelo kamanong yeo ya bona go tloga moo. O be a phela a mo iša Orange Farm, kgole le mosadi wa gagwe, ge a be a nyaka go ikutswa le yena. Gabotsebotse, mosadi wa gagwe o be a sa tsebe le gore o gona gobane mamogolo wa gagwe, yena mong wa wona, a be a hlokofetše pele a ka o dula. O be a se na ngwana gomme bjale ka bontši bja mafa a gagwe, ngwako woo o ile wa fiwa Moleko go ya le ka takatso ya gagwe ya lehu.

“Le gona ke nyaka go robala. Ke be ke bereka bošego. Ke tla go bona ka morago,” o ile a kgaotša dikgopolo tša gagwe gomme a emelela, a lebile ka go ye nngwe ya diphapoši tše pedi tša borobalelo.

Monagano wa Reneilwe o ile wa etela morago gae. O be a duma eke Shawn a ka letša gomme a mo ntšha ka kgotlompong yeo ya bodutu.  A fetša ka go ipotša gore bokaone a be le sebete gomme a mo romela molaetša wa WhatsApp. Fela:

Hi

Go ile gwa fela metsotso ye metelele ye mehlano pele diraethana tšela di ka fetoga tše talalerata; ebile a šetše a thoma go tšoga, ka kgopolo ya gore Shawn ga a nyake go bolela le yena. Gwa kwala modungwana gomme a napa a taboga ka pejana a topa sellathekeng ka myemyelo.

Hi Sweet Angel. Are you fine?

Yes. Wena? Ke maswabi ka seo se diregilego mosegare.

O se ke wa tshwenyega ka seo. Ka wena …
Nka lebelelana le tau ka mahlong, sweetness.

Reneilwe o be a tloga a ikepetše poledišanong ya bona mo a ilego a ba a lebala gore o a apea. Seresanta Moleko o ile a goelela ka lentšu la boroko go tšwa ka phapošing ya borobalelo, a botšiša ge eba o ikemišeditše go mo fišetša ngwako, ge a ekwa monkgo wa bogobe bjoo bo swago.

O ile a laelana le lesogana la gagwe gomme a tšwelapele ka go apea, pelo ya gagwe e edile.

***

Re botše seo o se naganago: Na Reneilwe o katilwe ke George Moleko? Gobaneng o realo?