Reneilwe o be a ituletše ka khitšhining, a hlatswa dibjana, ge mogala wa gagwe o tla thoma go lla sebakabakeng gomme leina la ‘Suzzy’ la tšwelela sekerining. O ile a kwa mmele wa gagwe o thuthumela ge a o topa gomme a tšwela ka ntle. O be a kgona go kwa meetse a dirile lešata ka phapošing ya go hlapela: Moleko a hlapa, a opelela godimo.

“Hello,” o ile araba, a fela a gadima morago go kgonthišiša gore Moleko ga a gona.

“Hi babes. Ke nna, Shawn. O šetše o boile?” lentšu le ile la botšiša go tšwa ka thokong ye nngwe ya mogala.

“Aowa. Eupša ke tla fihla e se kgale,” Reneilwe o ile a realo ka lentšu le boleta, mahlo a gagwe a tletše letšhogo. O be a thabetše gore Shawn o leditše – mola  ebile a tšhogile gobane a tseba gore mogala woo o ka mo tsentšha mathateng a magolo. “Bona, ke tla go bona gosasa, morago ga sekolo. Ke lapile gona bjale. Ba re rutile kudu mo ebile le hlogo ya ka e a dukuloga.”

“OK! Go lokile, babes. Ge fela wena o le right. Ke fela pelo ya go bona sefahlegwana seo sa gago se se botsana gape, moratiwa,” Shawn o ile a bolela bjalo ka lentšu le lekotwana. “Ke a go rata.”

“Re tla bolela ka moso.” O ile a lahla mogala gomme a boela ka khitšhining ka myemyelo. O be a sa kgolwe ka moo a bego a na le mahlatse ka gona ka go kgona go fihlela Seresanta Moleko poledišano tša bona, yoo go lego molaleng gore o be a tla hlakana bjaša ge a be a ka ba tanya.

Shawn le Reneilwe ba be ba ile ba fetša diiri ba bolela maabane ge Moleko le bagwera ba gagwe ba be ba le gare ba ipolaiša dinotagi ka mola ntle, le makgarebe a bona. Reneilwe o be a sa ikwe a lokologile go ka dula le bona, bjale ka mehleng, gobane e le yena a le noši yoo a sa sorego madila. Le gona ba be ba mo feta kgole gomme a ikwa a jewa ke bodutu.

“E be e le mang yoo?” Seresanta Moleko o ile a botšiša, a eme monyakong woo o lebago ka phapošing ya bodulo, a sa apara selo, ntle le toulo yeo e bego e bofilwe dinokeng. Phatla ya gagwe e be e šošobane ka pefelo, difaka tša gagwe di binabina.

Reneilwe o ile a kwa teng ya gagwe e biloga. “E be e le … E be e le …”

“Hei! Bolela wena! Ke mang yoo a bego a le mo mogaleng?” O ile a homola gannyane, gomme a mmatamela, ka pefelo. “Oooh! E be e le mfananyana yola, akere?”

“Aowa!” O ile a lla, a boela morago ka mahlo a go tshotshoma meokgo. “E be e le mogwera wa ka, Suzzy. O a bona,” o ile a realo, a mmontšha leina leo le bego le le sekirining.

“Tliša mo! Go tloga leng o na le mogwera yo ba rego ke Suzzy, wena? O nagana gore ke setlaela, ngwanenyana?” O ile a mo kgaphurutša mogala gomme a leletša nomoro yeo. “O se ke wa gopola gore ga se ke bone seo se bego se direga maabane. O hlwele o le mogaleng letšatši ka moka, o tšhatha, eupša ge ke lebelela WhatsApp ya gago ga se ke hwetše le molaetša le wo tee, ge e se fela methaladi e se mekae moo o bego o botšiša ngwaneno ka tatago. O swanetše goba o phumutše poledišano ya gago.” O ile a realo, a bea mogala tsebeng.

Reneilwe o ile a duma eke lefase le ka phatloga gomme la mo metša ge a ekwa mogala o lla. Moleko o ile a o bea sepikareng.

“Babes,” Shawn o ile a fetola, ka lethabo. “Ke a bona gore a o kgotsofale ka go kwa lentšu la ka, niks,” o be a kwala a tletše thaloko.

Moleko o ile a kgaotša mogala, mahlo a gagwe a tuka boka a tau ka leswiswing. A lebelela Reneilwe a tsuputše le molomo, ka šutša.

“O a njolela? Mmm! Nna? Nna yo ke hlokometšego wena le lapanyana lela la geno? Nna? Nna yo ke go rutilego dilo ka moka? Afa o a tseba gore ke nna mang wena, mara?” O be a betše, a šobathile Reneilwe ka melala.

Reneilwe o ile a ngwapa seatla sa gagwe, mahlo a gagwe a tšwetše ka ntle, a palelwa le ke go hema.

“Ok! Lehono o tla ntseba gore ke mang.” O ile a mo kgokgoišetša ka ngwakong ka letsogo. “Morago ga dilo ka moka tšeo ke go diretšego tšona wena le family yela ya geno? Ke yona tebogo yeo ke e hwetšago ye? O njolela ka mpša yela? Mošemanyana wa maminana?” O ile a topa sethunya sa gagwe godimo ga sofa gomme a kgotla Reneilwe ka sona hlogong, mahlo a gagwe a hwibitši boka lelahla leo le tukago.

“Ga re ratane! O be a sa mpherega!” Reneilwe o ile a lla, a thuthumela ka letšhogo.

“Oh … Ga e sale mogwera wa gago bjale. Sharp sharp le ntlwaela blind lena ba babedi. Le nagana gore ke setlaela?” O ile a kiteletša sethunya ka maatla gomme Reneilwe a hlahlaregela morago, a sekhumula.

“Ke a kgopela! O se ke wa mpolaya, malome Moleko. Nka se sa bušeletša!” O ile a kwatama fase.

“Hei! Emelela!” O ile a mo kukela godimo ka terekisutu. “Lehono o tla ntseba gore ke mang! O wa ka wena! Ke ya go owna! Ke nna ke go dirilego seo o lego sona! Ga o na mošemanyana yo a tla no tlago mo a fihla a ja mphufutšo wa phatla ya ka ne. Esego ke sa phela,” o ile a homola gannyane, a hemela godimo. “Rwala dipeke tša gago. Re boela gae gona bjale. Ke nyaka gore o nkiše thwii go mpšanyana yeo ya gago. Ke nyaka go e ruta thuto yeo e ka se tsoge e e lebetše. Ke fetše ka yona once. Phakiša!”

Bobedi ba ile ba leba ka phapošing ya borobalelo gomme ba apara. Pelo ya Reneilwe e be e dutla madi ka gare. O be a šetše a kile a kwa ka ditabatabana tša maphodisa ao a bolailego balekani ba bona eupša le ka letšatši le tee a sa ka a nagana gore le yena a kaba yo mongwe wa dipalopalo tšeo. A direng, o ile a ipotšiša, a rogaka letšatši leo batswadi ba gagwe ba tlišitšego monna yoo maphelong a bona.

Moleko o be a otlela bjalo ka setsenwa ge ba be ba lebile gae. O be a sa betše gomme a fela a gopotša Reneilwe gore ke yena mong wa gagwe, ebile ga gona selo goba motho yoo a ka fetošago seo. Ešita le tatagwe.

“Ke a se tseba seo! Ke ka fao ke rilego  nka se sa bušeletša. Nka se sa bolela le yena gape. Ke a ikana. Ke a kgopela hle, o se ke wa  mo gobatša,” o ile a sekhumola, a kgapha meokgo.

Seresanta Moleko o ile a mo gerula ka mahlo a manyenyane, a tlabilwe ke seo a se badilego lentšung la Reneilwe. Go be go le molaleng gore o be a tloga a kgathala ka mošemanyana yoo – gomme  seo sa dira gore a boulelwe le go feta.

“O a mo rata mfana yola?” Mahlo a gagwe a be a ikepetše sefahlegong sa Reneilwe.

Reneilwe o ile a metša lefeela. Sefahlego sa gagwe sa taga ge a gopola ka Shawn. O ile a gopola ka mo a ikwelego ka gona ge ba be ba le mmogo mola mabenkeleng a kgoparara. Ka mo a ilego a mo segiša ka gona. Ka moo madi a gagwe a ilego a elela ka ditšhikeng tša gagwe ga monate ge Shawn a mo gokarela mola ba dumedišana. Lentšu la gagwe le lekotwana la duma ka hlogong ya gagwe, le mmotša ka moo a mo ratago ka gona.

O be a nyaka go botša mphenyašilo yoo wa monna therešo ka mo lona lesogana leo, a le bitšago mpša, le bego le mo dira gore a ikwe ka gona. Ka moo Shawn a mo hlomphago ka gona, a mo fa mahlasedi a kholofelo mabapi le tša lerato. Esego bjale ka yena – yoo  a bego a mo swara bjalo ka lekgoba la thobalano gobane a etšwa lapeng la go hloka.

Eupša Reneilwe a gopola ka mokgwa wo mongwe ka potlako ge a lemoga ditlamorago tša seo: lehu. O be a tseba gore o golegilwe ka moo gare ga kamano yeo ebile go se na ka moo a ka phonyokgago. Moleko le yena o be a phela a mo gopotša seo ka bo yena, ebile a tseba gore o nepile.

“Mphetole, dammit!”Seresanta Moleko o ile a kgadimola, a mo lebeletše mola pefelo e golela godimo ka gare ga gagwe.

Reneilwe o ile a thuthumela ka letšhogo ge a ekwa lešata la dipele le tletše moyeng. O ile a emiša mahlo a gagwe go tšwa manaleng gomme a a bušetša pele tseleng. Lori ye kgolokgolo e be e ba lebile. A napa a lemoga le semetseng gore go direga eng!

Pefelong yeo ya gagwe, Moleko o be a tsene ka mothalading wo šele – gomme  bjale ba ile go thula ka dinko!

O ile a tswalela mahlo a gagwe ntle le go nagana, sefahlego sa gagwe se retologetše thoko mola Moleko a leka ka maatla go phefa kotsi yeo.

Modumo wo mogologolo wa napa wa bipa sello sa gagwe gomme a tima.

***

Re botše gore o nagana eng: Na Moleko o rata Reneilwe, goba o no mo tšea bjalo ka thotho ya gagwe, ‘lekgoba la thobalano’?