Reneilwe o gorogile mabenkeleng kgoparara ka iri ya bone mathapama. O be a bogega bjalo ka mmotelara ka gare ga pokathe ya gagwe ye ntsho yeo baswa ba rego ke skinny jean le bakana ya go mo kgomarela ya mokgopa. Meriri ya gagwe e be e bofetšwe ka morago, e utollotše sefahlego se boreletšana, se se tsothwa ka mahlo a magolo a bonolo ekego a namane.

O ile a lealea a nyakana le sefatanaga sa Seresanta Moleko eupša a se hloka. Na a ka ba a le kae, o ile a tlabega, a ithekgile ka pilara yeo e lego ka pele ga le lengwe la mabenkele. Ya ba o kwa pelo ya gagwe e fofela mogolong wa gagwe e le ge a bona sefahlego seo a se tlwaetšego ka gare ga lešaba la batho. E be e le Shawn! Reneilwe o ile a kwa a nyaka go iphihla ka morago ga pilara yeo, eupša a lemoga gore o šetše a latetšwe. Shawn o be a mo lebeletše ka myemyelo a lebile go yena.

“Ke bona mang bjale? Sebotsana sa ka,” o ile a realo, a batamela.

Reneilwe o ile a myemyela gomme a re, “Hi Shawn.”

“Na o lebile kae ka dipeke,” o ile a botšiša, a lebeletše mokotla wa gagwe wo moso le morabana wa sekolo. Reneilwe o be a tšere morabana woo go tšhela moratho wa gagwe phori mahlong, ka ge a be a phela a na le maseme ge a mmotša gore o tšwa ka taba tša sekolo.

“Ke ile go tsenela dithuto tša Mokibelo mola Joburg. Ke sepela le malome.” Mahlo a gagwe a be a feletše lebatong ge a bolela mantšu ao.

“Joo! Na o bolela ka monna yola a nyakilego go mpetha mosegare? Kgolomodumo!” o be a bonala a tšhogile.

Reneilwe o ile a sega, a dumela ka hlogo.

“Uhh! Ke rapela gore a se mpone. Otherwise o tla tshwa mollo gomme a mphetoša molora. Esego o le botsana bjalo,” o ile a realo, a mo lebelela go thoma hlogong go fihla disantaseng tša gagwe tše di hwibidu.

Reneilwe ga se a fetola. Le yena o ile a mo topa ka ntakana gomme a kgahlwa ke mmele wa gagwe wa mešifašifa woo o bego o tšweletše ka tlase ga besethe ya gagwe ye tšhweu ya go mo kgomarela bjalo ka pokathe ye ntsho yeo a bego a e apere. E be e le tšitširipa, bjalo ka ramatswele wa moswa. Reneilwe o ile a kwa pelo ya gagwe e binabinišwa ke monna ka lethabo, la pele bophelong bja gagwe.

Mohlomongwe e be e le ka gobane monna a le noši yo a kilego a ba le yena bophelong bja gagwe ka moka e be e le Seresanta Moleko – ebile e se ka thato ya gagwe eupša e le fela seo a bego a gapeletšega go se dira go phediša lapa la gabo. Go be go ka se kgonege gore ba phele fela ka mphiwafela wa tatagwe wa bogolofadi.

“Bona babes … Gobaneng re sa ye ka mola KFC ra hwetša sengwenyana?”

Reneilwe o ile a lebelela sešupanako sa gagwe sa letsogo gomme a lealea ka gare ga lešaba la batho. Go be go sena le mohlalana wa sefatanaga sa Seresanta Moleko. “Ke na le metsotso e se me kae.Okay!”

Ba ile ba leba KFC, Shawn a swere monwana wa gagwe wa gare ga bonolo. Reneilwe o be a nyaka go tšhabiša letsogo la gagwe, eupša selotsoko ka gare ga gagwe sa mmotša gore o tloga hloka seo. Gabotsebotse, pelo ya gagwe e be e nyaka gore a dire le go feta moo: a mo gokare letheka gomme a mo šutetše kgauswi. O be a tloga a ekwa gore go na le kgokagano magareng ga bona. E be e ke go na le maatla a kese ao a kgethegilego ka mading a bona.

Shawn o ile a beeletša dijo gomme ba di letela, ba hlamula ka mošomo wa sekolo. Mafelelong, nomoro ya bona e ile ya tšwelela ka thoko ga sekerini sa ‘Ready to collect’.

“Ke nagana gore ke swanetše go sepela bjale. Bomalome ba kaba ba nkemetše ka mola ntle,” o ile a realo ka pejana, a sora seno sa gagwe ka seterowo, ba tšwela ka ntle.

“Eish! O a rereša. Etla re sepele. Ga ke nyake gore kgolomodumo e nkhwetše mo le wena. Esego bjale, die poppe sal danse. Go tla nkga go sa bola!” o ile a realo, gomme ba sega mmogo.

“Kgolomodumo,” a ngunanguna ka temošo, a lebeletše pele, letsogo la gagwe le le mokokotlong wa Reneilwe.

Selemo e be e le ngwagola. Reneilwe o ile a kwa mmele wa gagwe o tšidifala ge a bona Seresanta Moleko a ithekgile ka sefatanaga sa gagwe, a phuthile le matsogo, a lebelelega a fela pelo. O ile a ba bona gomme a tabogela moo.

“Joo! O re bone.” Lentšu la gagwe le be le roromela ka letšhogo mola a kgotla Shawn ka sejabana.

“Oh Dammit!” O ile a realo, mogolo wa gagwe o omile, a tloša seatla sa gagwe ka morago ga Reneilwe ka lebelo.

Seresanta Moleko o be a tloga a ba batametše kudu moo ba bego ba kgona go kwa ge a šutša. Ka letšhogo, Reneilwe o ile a phamola mokotlana wa gagwe diatleng tša Shawn, a mo laela ka go ngunanguna.

“Go diragala eng mo? Wena!” Seresanta Moleko o ile a bela, a botolotše Shawn. “E sale wena gape!” O ile a šobatha mogolo wa Shawn ka letsogo la ntsogohlo, mola la mmagoja le dutše godimo ga sethunya seo se bego se lekeletše lepanteng la gagwe. “Ga o theeletše, akere? Botsebotse wena ga o kwe, mos!” O ile a realo ebile a mo kgwahliša.

“Mo tlogele! Re noba bagwera fela,” Reneilwe o ile a lla, a lealea gare ga batho bao ba bego ba hlaletše.

“Selo se se a o latela, wena man! O nagana gore ke setlaela!?” O ile a goa. Mahlo a gagwe a mahwibidu a lebeletše Reneilwe. “Go nkga legotlo mo!”

“Ke go botša therešo. E noba mogwera fela. Ke a go kgopela, mo tlogele a sepele. Ke a o rapela Malome Moleko,” meokgo e be e elela sefahlegong sa gagwe se boreletšana.

Seresanta Moleko o ile a lebelela Reneilwe gomme a lahlela mahlo go Shawn, a šošobanya phatla ya gagwe ka pefelo le go feta. O ile a mo kgoromeletša morago. Shawn o ile a hlahlarega, matsogo a gagwe a le mogolong wa gagwe wa go sasamela, a gohlola.

“Ge nka go bona gape kgauswi ga gagwe … ke tla go hlahlamola bjokwana bjo. Ke a go botša mošemane towe!” O ile a retologa gomme a goga Reneilwe ka letsogo, “Wena, etla. Ke tla šomana le wena ka morago.”

Ba ile ba tlogela Shawn a eme gona moo, a swere dikhuru, a šitwa ke go hema, goba go fihla ge ba tsena ka sefatanageng gomme ba thakgoga bjale ka sesasedi.

O be a ipotšiša ge eba Reneilwe o be a mmotša therešo ge a re monna yoo ke malome wa gagwe. Seo a se bonego ka mahlong a monna yoo e be e se fela pefelo. E be e le bjalo ka mona. Na ekaba kgarebe yeo a bego a nagana gore ke lengeloi … e be e na le blesser? O ile a otlologa gomme a tloga moo lešabeng la batho bao ba bego ba sa mo hlaletše.

Aowa, esego naletšana ya gagwe ya go benya. Reneilwe e be e se selo eupša lengeloi mahlong a gagwe. O be a ka se dire selo sa mohuta woo, o ile a ikgotsofatša, a rera go mo leletša ka moragonyana.

***

Re botše: Ka se sebaka, o ka bitša Moleko gore ke ‘blesser’? Gobaneng o realo?