Ongekawubeki umcondo wakhe eNtshona Koloni makazibulele.
Sizwe esiMnyama ngxengxezani, ufikile ugilikankqo.
Ndithetha ngantoni xa ndingathethi ngobudlobongela?
Kwowu! Kufa unguSathana ubuqu!
Ndinga ndingakusiphula kunye nengcambu.
Emahlathini kwiingxondorha zemiwonyo,
Kwindlela ezihlasimlisa umzimba.
Phakuphakundini eliphaphazela ezirenkini,
Lidal’ udushe neziqalekiso kuphalale igazi.

Yaba yindyikitya yendakado kwele ntlanzi, kwafika iziingqimba zamadoda angcole ungele.
Satsho sazizigculelo nezonyeliso kwizizwe ezisingqungileyo.
Kanti yintoni na le igqiba abakhuluwa nabaninawe bethu?
Kanti yintoni na le igqugqisa ootata nomalume bethu?
Kubangasa liyahlanza uselwa.
Kubangasa sicula uwakrazulwa.
Kubangasa ootata bashiya amakhaya ngenxa yelikrele.
Bambi bakhala esimantshiyane kuba amagama wabo asematheni.

Phakamani zinkokheli yoyele.
Mandibhenele kuni zingwevu nani zingwevukazi uxam waphusile,
Kokwani na okukufa kungaka?
Luphu na uncedo lobubuhlobongela.
Ukufa kwesiquphe obugqiba isizukulwana.
Kufandini ulitshutshumbisile
Ilizwe nenkohlakalo yakho.

Abantakwethu bajongene ngezikhondo zamehlo,
Mehlo azel’ yinkohlakalo nenzondo.
Ulincothule ithemba lethu, uyidlakazile imphefumlo yethu,
Ngezo zijwili nemiphefumlo engenatyala.
Uzidakumbisile iintliziyo zabakhweli.

Inene umbeki-nkosi indawo akayihlali
Umhlaba ucotshelwa yinzolo yamadlaka
Kwimithambo yobomi kuthuntutha ityhefu
Ezoboza umzimba uzale inkohlakalo,
Inimba nobuntu bufe namthanyane kulawula ubulwanyana.

Inene ukudeda kwemvisiswano ekuhlaleni,
Kukuphela kobuciko kwizithethi.
Kukunkqongophala kwempucuko nenkqubela phambili kwiziphatha-mandla
Kanti ke ikhaba alithenjwa.
Mela nto zakuthi mela zithwalandwe zoMzantsi Afrika.
Masingabi sayilanda kakhulu le nto noko ngathi incinane nje ingasuka inwenwezele,
Ubona nje wena imfazwe isuka eziko.
Inene ulunya lubiz’ olunye.

Umanyano ngamadla
Isisele senyathi