Ḓuvha na ḓuvha Vho Maria na Vho Tshinakaho vho vha vha tshi vuwa nga matsheloni vha ya badani u lugisa afho hune vha rengisela hone zwithu zwavho zwo fhambananaho.Vho Maria vho vha vha tshi rengisa zwiḽiwa zwe vha vha vha tshi zwi bika na mitshelo ye vha vha vha tshi ḓiselwa nga ṅwana wavho.

Vho Tshinakaho vhone vho vha vha tshi rengisa miṅwenda na vhukunda na rokho dze vha vha vha tshi tou ḓi rungela. Tshiṅwe tshifhinga vho vha vha tshi ita vha tshi rengisa na miroho ye vha vha vha tshi tou ṱavhelwa nga mukalaha wavho. Zwithu zwe havha vhathu vha vha vha tshi rengisa zwo vha zwo fhambana.
Vho Maria vho vha vha tshi dzula vha na vharengi ngauri afho fhethu ho vha hu tsini na mushumoni wa muṅwe ṅwana wavho we a vha a tshi ri zwezwi hu zwifhinga zwa u ḽa a kunga vhashumisani uri vha ṱuṱuwedze mme awe nga u renga zwiḽiwa zwavho.

Maḓuvha a u thoma vho vha vha tshi renga vho fhumula kana vha khou amba nga tshavho. Henezwi maḓuvha a khou ya vhaḽa vhaṱhannga vha zwi dzhiela nṱha uri hu na vhaṅwe mufumakadzi henefho tsini vhane vha vha Vho Tshinakaho, vhane vha rengisa zwiambaro na miroho zwe zwa vha zwi si na vharengi.

Ḽiṅwe ḓuvha muṅwe mutukana a ri u swika a thoma u hevhedza uri ndi ngani avho Vho Tshinakaho vha si na vharengi, Vho maria vha ṱalutshedza vhaḽa vhaṱhannga uri Vho Tshinakaho vha ya buba vha songo ṱohola nahone ndi ngazwo vhathu vha sa rengi zwithu zwavho.

Zwe zwa mangadza ndi uri vhaḽa vhaṱhannga nga u pfa izwo vho thoma u hoyedza, u kolela na u sea Vho Tshinakaho vha tshi ita vha tshi vha sema nga u vha havho mualuwa.

Ho vha hu nga ḽiṅwe ḓuvha Vho Tshinakaho vha na vharengi vhe vha vha vha khou ṱoḓa u renga iṅwe rokho henefho. Ndi afho vhaḽa vhaṱhannga vha tshi bvelela. U swika tsini vha thoma u vhidzelela vha tshi ḓivhadza vharengi uri mufumakadzi wa khuvhe vha a lowa. Vhaḽa vhathu nga u pfa zwezwo vha fhira vha songo renga.

Vho Tshinakaho zwo vha zwi tshi vha vhaisa muyani u goḓwa na u shushelwa vharengi saizwi vho vha vho fulufhela kha hone u rengisa uri uḽa ṅwana wavho a re kha ṅwaha wa vhuvhili ngei gudedzini a fhedze pfunzo dzawe. Ḓuvha na ḓuvha vho vha vha tshi ḽa muṱodzi u shamani saizwi avha Vho Maria vha tshi dzulela u rengelwa vhone vha sa rengeliwi.

Ho vha hu nga Ḽavhuraru mufumakadzi we a vha a khou bva thabeloni kerekeni hune ha dzhena ṱhama yawe a tshi swika a ima nga goloi yawe ye ya vha yo livha Piṱori hune a dzula hone. Uḽa mufumakadzi u swika fhaḽa a tshi khou renga mitshelo kha Vho Maria a vhona rokho dza Vho Tshinakaho dzi dza vhuḓisa, a sendela khavho.

O ri u swika a thoma u dzi farafara, a dzi vhanḓavhanḓa, a tshi ṱoḓa u vhona zwavhuḓi. A bula uri dzi tou vha rokho dzine a dzi takalela. A vhudzisa Vho Tshinakaho uri vha khou dzi wana gai, vhone vha si mu dzumbe, vha mu vhudza uri ndi vhone vha no runga.

Uḽa mufumakadzi a renga dzoṱhe a livha Piṱori nadzo. U swika a tshi sumbedza vhangana na vhashumisani vha dzi takalela, mashudu mavhi rokho idzo dza vha dzo fhela kha uyo mufumakadzi. Ha ngo teledza u dovha a ṱanga lwendo u ya Venḓa u ṱoḓana na Vho Tshinakaho uri vha runge dziṅwe nga tshihaḓu.

U swika Venḓa o wana Vho Tshinakaho vho dzula fhaḽa hune vha rengisa vhe hone. Vhuvhili havho vha ṱuwa vha ya ngei muḓini wa Vho Tshinakaho. U swika muḓini, mufumakadzi a khathuwa a tshi vhona mutumba une vha dzula khawo. A mbo ḓi vha ṱoḓela fhethu ha u rungela henengei Piṱori. Vho Tshinakaho vha pfuluwa afho Lukalo vha ya Piṱori u runga vha henengei. Zwiambaro zwavho zwo vha zwi tshi dzula zwi khou ṱoḓiwa nga vhathu saizwi hu zwavhuḓi.

Vhaḽa vhaṱhannga vhe vha vha vha tshi sea Vho Tshinakaho mishumo yavho ya mbo ḓi fhela nge khamphani ya vha i khou vala, Vho Maria vha sala vha si na vharengi.