O mphile lerato Pheladi

Wena ngwana’a Makopo

Wena ngwetši ya ga Kgotego

Wena kolobe ye ntsho

Wena koko waka yo ke ikgantšhago ka yena

O ntlogetše mahlokong Pheladi

Wa ntlogela mahlomoleng

Ka šala ke gakanegile boka namane e timeletšwe ke mmago yona

Ka lla sello sa masetlapelo

Ka hloka thušo ka ge yo godimo a be a go ratile

Ka gakanega ka hloka maphego ao a ka nkwešago borutho

O nkgodišitše, wa nthuta go hlapa le go dira tšohle

O bile mme go nna ge yo a mpelegilego a sa ile go sela

Wa ikana ka tšohle

Wa mpha dijo ka mehla

Wa kgonthišiša gore ke ya malaong ke jele

Ka ba mosadi wa nkiša basading

Wa hloka pelaelo ge re kgopela tše dingwe tša sekolo

Wa lwela gore re tšwelepele ka dithuto

Wa nthuta hlompho le lerato

Ka tšea mohlala go wena gore ka lapeng re swanetše goba ngatana ye tee

Go rene moya wa lerato le khutšo

Ke a go gopola Pheladi

Ge le hlaba le ge le dikela

Fela ke a tseba gore o na le nna bošego le mosegare

Modimo o go tšere ka pela

Bjale ke gakanegile ga ke tsebe gore tšohle o ntiretšego tšona ke go leboge bjang

Moya wa gago ga o tšwelepele go robala ka khutšo Pheladi’a Mahlako

O tšwelepele go re leta

Ke tla dula ke go gopola kolobe ya mashia legare