Ke phejane ya motho
Ke boikgantšho bja motho
Thorwana ya mafelelo
O reng o ntlhobola dikagare ka mahlo
O reng o ntebelela ka leihlo la ntšhotšhonono?
O reng o mpona eke ke sejo sa gago mapaing?
O reng o lebelela dirope tša ka e ke se go lekane?
Theeletša ke go botse mokgalabje
Ke kgarebe KGA! gare ga makgarebe
O ntebelele botse ka leihlo la ntšhotšho
Letswele la ka le sa eme kgo!
Se nnyatše mokgalabje tena
Ga ke sepele ke phaile ntepa
Ya ka ke a kgara ka ba ka e pata le ka lešago
Bo mokgalabje kgale ba di bona ga ke lebelele le ga tee
Ke na le seriti se nkaparetše
Le ge o nkapola sona , o gopole le ka moso
Ke na le bokamoso bjo bo phadimago rarago tate
Ke lesea la mme le tate se ntšhele mpholo gara maoto
Mahlo a gago a ntšhabiša madi ge ke a bona
Boemo bja gago bo ntšhišimiša boka motšhitšhi wa dinose
Ke lesea la nkga mekgato se nthute tša phaku
Ke lebone ke a phadima se time kganya ya ka
Ntlogele mokgalabje tena
Thaka tša gago di gona di go emetše.