Ntepa ke mokgopa wa kgomo,

Kgomo phoofolo ya go hlabiša mosadi,

Mosadi wa go apara wona mokgopa woo,

Wa šogwa ka bokgwari bja makgonthe,

Ka botswerere le bothakga bja go makatša,

Wa tlotšwa ka letsoku wa phadima phadiphadi!

Wa kgahla mahlo a bohle,

Ba ke ntepa,

Ntepa seaparo sa dikgarebe tša Bapedi,

BoHunadi le boPheladi,

Ba go agega ka letsopa la Afrika,

Bona ba go šila mabele ka thito le lwala,

Ba go ga meetse sedibeng,

Ba go apara dipheta le maseka,

Ba selaganya melala ya Tubatse le Sekhukhune,

Ntle le poifo ya kato goba thogako,

Ba myemyela ebile ba itshepa,

Ntepa ke segagešo sa bomakgolokhukhu.