Ngicela ubachazele ngami

 

Ngingowesifazane oyofa ezama

Ngingowokuqala ezinganeni zika ma,

Kwazise yena uyise wasuka eceleni kwami,

Kwakumele ngithi baba kuye,

Namhlanje ngithi baba kwi ndoda ezalwa no mama

Kwayona leyo ndoda engiyibiza ubaba ingenzela ezibukwayo,

Ukube akuyena lo ogqiba indlala ekhaya ngabe nakubomthetho isifikile le ndaba eshisayo,

Ukube kuya ngami ngabe ngiziphosa kwabamdayo,

Ngisho lo mama engimthandayo ungijikele ay mina akekho engimthembayo

Ngoba ngisho ngiguqa ngedolo ngimbiza engimthembayo,

Akushintshi lutho ngisaseyiyo ingane yakhe ekhalayo.

 

Kumalume ngangifana nengane ayizalayo,

Kumalume namhlanje ngiyingane ayifunayo,

Uzenzela umathanda, kuye ngiyinyama ayihlafunayo

Ithambo lakhe alicabayo

Uma kuhlwa sengiyazi ukuthi uzokwenza lento ayifunayo,

Ukuphuma kwelanga imilomo siyivala ngathi akukho okwenzekayo

 

Sengiphenduke umfazi kumalume engangishelanga,

Umalumekazi kukhona imfihlo ayifihlelwayo,

Ngiyabona useyasola ukuthi kunento eyenzekayo,

Ngithi ngimluma indlebe kodwa phinde ngiyakwesaba kufa,

Ngikhumbula njalo amazwi endoda ethi “ungalinge uyithi vuu”

Ngiyazi kuyoba ukulamba nokufa kwami

Akekho noyedwa ofisa impilo yami

 

Ngihlezi ngikhala izinyembezi,

Kwazona lezo nyembezi emehlweni akho ubona injabulo,

Ngoba okwenzekayo akuvelanga obala ngiyingane nje efela ubala,

Ngifela ngaphakathi phela kwamphakathi uthi ngizalwa umthakathi,

Ngingeke ngiphike vele nami ngikubonile lokho ukuhamba kwesikhathi

Ngangithi nginomama esaphila,

Ngangakubona konke lokho kodwa ke ngoba esengasekho ngiyamdinga okwenkonyane efuna ukunceliswa

 

Kwale sengithi ngiyithi vu kuthisha esikoleni,

Phela ke naye uke wabona intombi kumina,

Ubengincoma ethi ngiyazibona ngimuhle futhi sengikhulile

 

Inhliziyo yami iyabalisa,

Inqondo yami iphazamisekile ngoba ngisho esikoleni senginenkinga,

Kwakuyimi leya ngane ebidume ngokuphuma phambili,

Namhlanje kuseyimina lo ophuma phambili ekugcineni kwabo bonke

 

Igama elithi “usushintshile” ngilizwa nsuku zonke

Ngebhadi angizenzanga inkinga aniboni nonke

Inhlanzi iswele amanzi

Mabekhuluma ngobuntombi babo kimi kubuya isithombe sika malume,

Ngiyomkhohlwa ngifile ngoba kwasoka lami liye langishiya,

Sengize ngikhethe impilo yokudayisa ngegugu lami

Ngoba umalume wakhetha ukuthatha ubuntombi bami

Akasekho kimi useku sisi wami

Khumbula ke! loyo usisi omncane ongelamayo nami

Ungalinge uyifise impilo yami

Ngikhipha lodaba nje lento iyangibulala nami

Sengize angisanandaba umalume angimthembi mhlawumbe sekuwukufa kwami.