Ngenkondlo yami ngiyaphila,

Ngenkondlo yami nizophila,

Emhlabeni ngifundile ngibonile

Ngenkondlo yami ngizonifundisa,

Ngenkondlo yami fundisekani,

Emoyeni nasenyameni ngizonelapha,

Inyanga kayizelaphi mtakababa,

Nami ngilashwa yiyo lenkondlo,

Oyifundile axoxele ongayifundile,

Nami ngizonixoxela ngengikubonile,

Ngiboleke indlebe namakhala,

Ngifun’ubheme ukholwe yilenkondlo,

Nabangakholwa bakholwe ngeqiniso,

Ngalenkondo ngizokhulum’amaqiniso,

Ngalenkondlo ngiyinyanga ngizoniqinisa,

Amanxeba ngenkondlo ngizowapholisa,

Abalahlekile ngenkondlo ngizobabuyisa,

Lezigwegwe ngenkondlo ngizoziqondisa,

Ngoswazi lenkondlo ngizonenabisa,

Ngalenkondl’abangathandi ngizobanelisa,

Ngoba kanizwa ngizonithwishila,

Amakhizane ngenkondlo ngizowathintitha,

Ngenkondlo yami sonke sizophila.