Ndiyeke thethe
Ndidicela ndibolek’ indlebe
Ndithethe ndithetha isiXhosa
SiXhosa somXhosa
Esisulungekileyo somXhosa
Nditsho sigagxojwanga
Sixele mpukane marhiwini
Ndiyeke ndidanduluke ndibhodle
Ndibize magama ndidlala
Ngolwimi kuba kaloku
NdingumXhosa womXhosa
Othetha isiXhosa phathi,
KwamaXhosa emaXhoseni
Apho kungqushwa khona
Kungqushwa mbhona
Kutsho kufuduk’ indlala
Ngendityatyadula ndixele
Hashe lomdyarho likqukqa,
Ligqabadula lingqwashe zingqwashu
Ntonje ndiphelelwe ngamazwi