Selokhu kwathi nhlo
Ngiyimi nezinto zithe nko
Ngiyintith’ engena kusekelwa
Ngob’ angikwazi nokuzitshela
Ngemvelaphi yam’ angiyazi phela
Sengikhathel’ ukubekezela

Mama sengikhulile manje
Kunemibuz’ eding’ izimpendulo nje
Ukuze nami ngokwaz’ isiqu sami nje
Kungabi sekuthuleka cwaka
Njalo ngilokhu ngahuny’ iswayi
Ngingazazi nokuthi ngingowaphi

Mama ngingowaphi?
Isibongo ngingowakwabani?
Imvelaphi yam’ ilaphi?
Isiqu sami sasalaphi?
Kant’ izithakazelo zami zithini?
Uma bengibuz’ abantu ngithini?
Kanti mina ngiyiliphi?
Mama ngicel’ izimpendulo

Sengikhathel’ ukuba yimpundulu
Njalo ngilokhu ngagund’ imbungculu
Kazi yisiph’ isisulu?
Sokuthi ngondliwe ngumalume
Ekubeni engangizali
Ekuben’ engalon’ igazi lami

Kant’ eyam’ inkaba yasalaphi?
Kant’ eyam’ injabulo yayaphi?
Owam’ ubaba kazi wayaphi?
Mama ngingowaphi?

Mntanami kunzim’ okwangehlelayo
Kubuhlung’ engakubonayo
Ngawami ngingaxoxeliwe
Ngiyasola ngangidalelwe
Ukuba ngikuthole ngaleyandlela

Ndodana yami
Uyihl’ usekhona
Futh’ usadl’ anhlavana
Unjalo nje uyamazi
Kunzim’ ukuchaza lamazwi
Uyihlo nguyen’ umalume wakho

Engingakusho nje
Ngukuthi wacela ngimsiz’ umfwethu
Kwaba ngukuthi sasisobabili kwethu
Kwaba ngukuthi ngimsiza ngokocansi
Nathi sasisebancan’ ezingen’ eliphansi
Ngamangala ngithol’ ukuthi ngimithi
Mntanami ngingasengiy’ ezimithi
Mntanami wen’ ungowakithi