Nna tšhiwana ngwanenyana wa mme ke a di bona

Ge ele kwelobohloko go nna ga e gona

Ke bonwa ke le wa go tloša batho bodutu

Ruri ke itlhobogile masetlapelong a banthadiyago

Sello sa ka banna ba ithabiša ka sona

Mme le ntate ba mpelegetše ba pelo tše kgopo

Sello sa mme se fetogile pula ya medupi

Meokgo e ela bošego le mosegare

Ke nyadišitšwe mme le ntate ba sa tsebe

Ke nyadišitšwe banna ba lekgolo

Ke dirilwe lekgoba la modiragatši wa mabošula

Ke bogelwa ke merafe ya lefase

Ba di bona bare

Ge nka hwetša wa go swana le ena

Ba sa tsebe phororo ya madi pelong ya ka

Lehono ke tšofaletše mahlomoleng

Mahlabišadihlong ke ge ke bogelwa ke bana

Ga ba mpone ke le mosadisadi

Ba bona ke le seithabišo sa bona

Ba re go ithabiša ba nape ba wele molekong

O palago go phekolwa ka ditaola tša bandawu

Ruri ke rekišitšwe mme le ntate ba sa tsebe

Ge nkabe ke bonwa ka hlakodišwa

Ge nkabe ke bonwa ka llelwa

Ge nkabe ke bonwa ka kwelwa bohloko

Ge nkabe ke bonwa gwa phološwa ba bantši

Bakeng sa go ka hlakodišwa

Ba re bona o bopegile

Bakeng sa go llelwa

Ba duma ge ba ka nkgokara

Bakeng sa go nkwela bohloko

Ba ithabiša ka nna

Bakeng sa go ka mphološa

Ba wetša bana molekong

Ka go ba bontšha tša mmele wa ka.