Keneilwe ngwanaka,
O se felelwe ke tshepo,
Tšhiwana yeo e sa hwego e letile monono,
Tšhiwana metša meokgo bohloko bo ikele,
Metša meokgo bohloko bo ye le pelo,
Meokgo ya gago a e wele fase,
Modimo o e ageleditše ka kgamelo,
Homola samme go tla loka ka moso,
Itshepele Moleta Israele yena Modimo,
Efa yena mathata a lefase ka moka,
O tla tseba go fetola ka nako ya maleba,
A go araba wa swana le bana ba baagelani,
Homola o fogohletše bohloko seatleng,
Sa go se fele se a hlola ngwanešo!
Se hloletše boHlabirwa le boMahlaku,
Mathata a lefase a hlagela bohle,
Ka moso le wena le tla go hlabela,
O tla atlega wa tla wa lebala mašuana,
Eba le tshepo ka bophelo bja gago,
Mathata a lefase a tlo feta bjalo ka moya,
Wa tla wa lebala go hloka sa go iša maleng,
Modimo o tlo go araba.