Ge o rongwa ke motswadi

Wa phetla molala, ke go mo nyenyefatša

Ke go mo tlontlolla le go mmona bošilo

Le nna ge ba re ke tle ke bitše mokete

Go gana ke tla be ke bontšha lenyatšo

Le go tshepagala, ke tla be ke sa tshepagale

Bagolo ba a hlomphiwa

Ge o romilwe o phethagatše ka bokgwari

Wa phethagatša ka natla, wa se dukuloge seolo

Le nna ke no ba ke le morongwa yo hlwahlwa

Le se nthogake la ntshwela ka mare

Ke no ba ke le morongwa wa go lata bao ba bitšwago

Ga ba bitšwe ke mafeelana empa dinatla le bagale

Ba re ba tle ba dudišane le bona, madulo a tlala diatla

Nna ke phethagatša wa ka mošomo ka bokgwari

Le gare ga mpa ya bošego a ke bo pate

A lena mantšu ke fela ke tšea ka tsebe

Le re nna lehu ga ke na lešoko, ke hlola ditšhiwana

Le fela le re ke se lahleleng ntaka go lena

Le lebetše gore ke morongwa ke romilwe

Ga ke na kgetho!