Yeka ngalezozinsuku laph’uthando lwethu

lwaluvutha amalangabi

yeka ngalezozikhathi uthando lwethu

lusemsulwa ungibiza nangengilosi yakho

owayilethelwa uMvelingqangi

kazi kwashintshaphi yise wabantwana bami?

Namhlanje konke lokho sekwashabalala

okwamazolo ekhothwe ilanga

yonke leyonjabulo nentokomalo sekwaba umlando

abantwana bami bahlezi bekhihla esikaNandi

bengibuza engapheli imibuzo ukuthi wadliwa

Ezakuphi izintaba

Kazi konakalaphi baba weyingane zami?

Ngadel’ikhaya Lami ngashiya abazali bami

Ngaqoma ukuzoba indlu yakho yokugugela

Kepha konke lokho kwakuyize leze bheka namhlanje amathunzi aseyawukela ukufa sekusemvakwami kodwa Wena awukho

Wakhetha ukudliwa izintaba zaseGoli

Kazi konakalaphi myeni wami?