Ukuhlakanipha kwami kungenze ngashiy’ inkolo
Ngalahl’ iziyalo ngazibona ngingcono
Bengikhuzwa ngingezwa, bathi:
Isala kutshelwa sibona ngomopho
Ngaphika nabangani sidudana ngemiqondo
Nakhu manje ngiphambi kwentolo
Sengiyingelosi njengoba imantsh’ ikhiph’ isigwebo
Ngikhal’ ezimathonsi ngiswel’ imbobo yokuphuma
Isono sami icala lami leli lizongibopha
Liyongivalela kwezimnyam’ izindonga
Kodwa ngiyakhala ngithi angilenzanga
Nginxusa ibheyili bayiphebezile
Bangifun’ ubufakazi, lutho abuhlangani
Isono sami icala lami leli lizongidla lingigojele
Ngingedwa ejele unembez’ uyangidla
Okomuhlwa ngaphakathi ngiphakathi eziphaqeni
Namanje ngiyasho la ngiboshelw’ amanqin’ enyathi
Lel’ icala angilazi lo umvuzo wokuphika nabangani
Besibaningi sengisele ngedw’ enkingeni
Abasekh’ abangani ngisezikhindini
Ngidons’ udilikajele ngangithi ngihlakaniphile
Kanti ngibhayizile abangani bangibhayizisile
Ubulima abupheli kodwa ukuhlakanipha buyaphela
Ngena sboshwa kusho iphoyisa lingikhumula amasongo kaSigonyela
Labe likhiya umshudo wejele lavala
Kwacaca bha zingikhalele ngempela ke manje
Kwahlw’ emini kwaphela konk’ ukwazi!
ibhalwe ngu:
Sthembiso Sydney Msezane