OKWENZEKILE KUYAFANA NOKUDALIWE

Mzukulu Wami uzungakhathazeki,

Sikhona sikubhekile kuphela nje sicelele Amandla,

Mzukulu ngiyazi buyafik’ubunzima uzibuze,

Kungani kwenzeke kimi?

Mzukul’uwami lalela la!

Ngithe Sikhona sikubhekile.

Ngithe kuphela wena sicelel’amandla enkosini,

Ngoba konke kulele kithi,

Ngoba konke kuqala kithi,

Ngoba konke kuqoqwa yithi.

Abanye Mzukulu esinabo la banomona,

Abanye Mzukulu esinabo la basagcwel’inkohlakalo,

Abanye Mzukulu balwa nempumelelo.

Kwanathi uqobo sibanjiwe,

Kwanath’uqobo siboshiwe,saphendulw’izitha zakho,

Kwanath’ezeth’izandla zisavuz’igaz’elagobhoza,

Kwanathi sasiphila kabuhlungu,sihlushwa,sihlupheka.

Lokh’okwenzeka kuwe nathi sasiphila nakho,

Lokhokwehlelw’azinkinga nathi sasiphila nakho,

Lokho kugula sasihamba nakho Mzukulu.

Amabhad’asilandela saze sangena naw’egodini,

Sasikhal’ubusuku nemini simemeza kungezwa muntu.

Manje esasiyikho kuvukela kuwe Mzukulu,

Manje esasikwenza kwehlela kuwe Mzukulu.

Yingakho ngithi sicelele Amandl’enkosini,

Yingakho ngithi sicel’ukugezwa sihlanjululwe,

Yingakho ngithi sicelel’intethelelo komdala wezinsuku.

Okwenzeke kithi kuyokwehlela Mzukulu ngoba kudaliwe,

Sicelel’amandla kuMdali.

Guqa ngamadolo Mzukulu ukhanyis’isbani usicelele intethelelo.

Uzungakhohlwa nokubik’inking’obhekene nazo.

Uzungakhohlwa ukuzicelel’ukuth’amacal’ethu awasuke phezu kwakho.

Ungakhathazek’uzokuzwa uzobunjwa kabusha.

Ibhalwe uMakhosazane Ndwandwe Shwala