Wena unguBongwe wekhethelo
uBongwe obelethwa Makhosi
Ubelethwa boNdabezitha Iingwenya ezingathuswa zizitha
unguMdumiseni owaduma ephasini ungakafiki nephasini abanye bathabela ukuthi iyeza iKosana
Abanye babuthana bahlanganisa amabutho ngoba batjhejile ukuthi nawufikako uyokubutha koke okungekwakwenu
Wena unguBongwe wamambala, kungakho neskhumba owathukwa ngaso simabalabala
Nakuvela wena iinhliziyo zabo ngawe zihlala zibalabala
Ukufika kwakho hlangana nabo ngamunye ngamunye bayanyamalala
Abangani unabo kodwana awunabo
Ngoba nalabo ebegade uthi bangani, ngak’sasa nivuka ungasazi ukuthi nibangani
Abangani unabo, bakho ukhethelwe
Bakho bazak’lethwa keyakho ipilo ngesikhathi esifaneleko
Kungakho ebegade uzikhethele bona boke bangasekho
Angitjho labo beza kuwe ngokuhlomula
Nalapho ebafika khona bathi bangabiza lakho igama ivuleke iminyango
Okuhle kufanele bona bodwa
Nababodwa bayazi ukuthi okuhle kutholakala kuwe, kutholakala ngawe
Bathi bangakuthola, omumbi kube nguwe
Wena ulikonyana lakoBaphathele Iye, kungakho nanamhlanje ithabo, ipumelelo nomnotho ubaphathele
Nemizila nasele iminengi irareja umkhumbulo, benyula bonyana kube nguwe ozak’fika ukhombe okungiwo – ubakhethele
Wena uyiNgwenya, ubelethwa ziiNgwenya
Yoke ipi uyithumba usonge imikhono
Barareke bonyana urhona njani umncani kangaka
Baliyeke ukulemuka bonyana ukhamba namabutho angabonwako
Olwa nawe ubethwa yinto angayiboniko
Idlozi lakho liyabanyenya abakhohlisi nabazensizi
Izitha zakho libahlaba basahlela ukukuhlasela
Uvikeleke mahlangothi woke, emkhanyweni nemnyameni uliLanga neNyanga – into ebangasoze bayifinyelela
Kwakho kubakhanyisela ubalethele nokufuthumela
Wena uyikakha yakoSoNtabakazi
Boke abasongela wena bayokusongana njengenyoka iphezu kwabovu amalahle