Gae ga Mahlako bowelakalana bja dirutegi le badiragatši
Ba bantši ba tswa gona Limpopo legae la ditiragalo
Go a direga mo gae Limpopo
Ge o dutše gona o bethelwa ke moyana wo mobosana
Moyana wa go fodiša mogopolo ge o rwele mathata a Gauteng
O otlologa kgopolo ge o lebeletše melala e metalana
O ipshina ka go bogela dithaba le dinokana tše kgolo le tše nnyane
O ipshina ka monate wa polelo ya go relela lelemeng boka todi
Limpopo ke legae la kgotso le lerato go mang le mang
Tlhago mmopi o tlogile a tiiša letsogo ka bophara
Limpopo ke mo go tletšego monate esego mathata
Diopedi di thuntšha mantšu ka melodi ya go fapana
Ba a opela ebile ba thwantšha le menwana
Ba bina mo le baditšhaba ba šalang ba swere mahlaa!
E le ge ba makala bokgoni bjo bokaaka go bana ba Limpopo
Diopedi ge nka bala ke tlo hlola lehloyo
Ba tlala diatla tše pedi go be go šale le bomakgokgorwana
Le bona ba tlile ga ba romeletša
Ba a raganhlana bošego le mosegare
Ke lethabo fela mo gae Limpopo
A go na bodutu gae Limpopo