La mathomo ge o nkgadima ntaka,

O rile ke tla dula ke le semomothela sa pelo ya gago,

Wa tloga o mpotša ge o nthata ka leratorato,

Ka re tlompšha tlompšha! ka gare ga lethabo,

Ka ipotša gore ke mahlatse bjang ka go hwetša lerato,

Lona leo bontšhi bja dithaka tša ka ba llago ka lona,

Bare a le hwetšagale bonolo nna ke le hwetša bonodiana,

Kgane o be o ntšhela phori mahlong nna ke sa bone?

Ka ge ke sa ba ka tseba ye ntsho le ye tšhweu gabotse,

Ke be ke sa tsebe le gore lefaseng go fasagane,

Ke ka fao ke go buletšego matsogo le mojako,

Wa ba o tsena le go tšea seo o se nyakago gonna,

Wa ntlogela ka morwalo wa peu yeo o e bjetšego gonna,

Ke mo lehono ke dutše fase ka maoto a masehla,

Ga o sa mpona bjalo ka letšobana lela la gago,

Go molaleng gore ga se nka o nthata o be o ntšhela phori.