Bao ba phetšego pele ga rena
Ba boletše ba re
“Tlogela go nyela ka mathuding gobane ge le dikela, o tla potla”
Ba e ra lena ba go itira bo motsebatšohle
Lena bago itira dinganga tša go se re selo
Le lebala gore ka hlogong ga se lefiwe.
Lena ba go šomiša batho bošaedi
Le ba dira makgoba a lena
Le lebala gore letšatši ga le hlabe go ya go ile
Gona le nako ya lona ya go dikela
Ke ra gona ge le dula thaba ka marago.
Tšatši la lehono le tomotše mahlo nke leribiši
Dikeledi di ela le sefahlego
Le ntšha leleme gantšintši go kwa tatso ya dikeledi tša lena,
Ebile le bona batho molato ka ge go sena tšwelopele maphelong a lena
Le lebala gore le ile la nyela ka mathuding
Bjalo le diketše, ga se la bona, le potlile.
Go be go le bose ge le ithuša ka mathuding
Le segiša ka batho,
Bana ba batho ba lla bošego le mosegare ka lena,
Ba bangwe ba bakilwe le badimo ba bona
Lebaka e le lena.
Ga bjale, bophelo bo boima, efela le ile go thušwa ke mang?
Le ba išitše ga maotwanahunyela
Ka lebaka la kgatelelo ya megopolo
Le dipolao tša matsogo a lena
Le be le bona bjalo ka batho ba go se loke
Gomme la ba ntšha maphelo a lena.
Ba bangwe ba tlile ka lerato,
Gomme la ba ralokiša nke a se batho,
Le itira diroba pelo,
Le retwa mahlakore a lefase ka moka,
Le tsebiwa lefase ka bophara.
Lehono le kae?
Lehono le na le eng?
Lehono le ikwa bjang?
Lehono le na le bomang?
Ga se lena ba go llelwa.