Maseana a be a sa le anywe,
Lekgoba go bitšwa motho moso,
Ntwa e le mogwera e eta nako le nako.
Nkgawane e lewa ke nkga
Madi ao a senago molato fase a tšholotšwe,
Ba leba moletemohlaelathupa bo Hector Pieterson, Chris Hani, Steve Biko….
Motho a panwa boka ya pholo pokolo.
Mmele bohloko o bo kwele
Moya o sena bodulo.
O be a e bofile ya gagwe P.W. Botha
A gana go bona moya motho mosong.
Bohlabela gwa rotoga mokgalabje Nkosi Mphakanyiswa Gadla
Yena a re tswalela lelata,
Ke ra Nelson Rolihlahla Madiba.
O e lwele morwa motho.
La gago leina dikgopolong tša Maafrika-Borwa
Le swareletše boka kgofa kgomong morwa Gadla.
O e kgafetše go direla Baswana,
Wa ineela moya tokologong,
Lehono re sepela ka go tsatsanka.
Wa gago mphufutšo ruri re tla dula re rutha ka gare ga wona.
O e lwele Madiba
O e lwele Rolihlahla
O e lwele Dalibhunga
O e lwele uBawomkhulu
O e lwele Tata!
Robala bja matlogadibešong boroko!