Ke fihlile motseng le šetše le thapamile. Ledimo, mogolo wa Tebatšo yoo e sego wa madi o be a le gare a kota bjang, a ikopelela. Sehlophana sa baotledi ba dithekisi sona se be se ithalokela papadi ya dikarata ka tlase ga moriti wa masenke. Ledimo o ile a tima motšhene wa go kota bjang gomme a tabogela go nna, mola ke mo dumediša ka myemyelo.

“Wena?” o ile a ntomolela mahlo ka phatla ya go šošobana.

“Ke nyaka go bolela le Morena Lamola. Ke na le molaetša wa gagwe,” ke ile ka gapeletša myemyelo.

O ile a retologa, a ikemišeditše go sepela. “Madala ga a hiri di driver. Ga a na nako ya dipelaelo tša botlaela go tšwa go bašomi ba ditlaela bjale ka wena. O a lwala gomme o hloka khutšo ya monagano. Tsamaya, mfo,” o ile a realo, a itshepelela ka go iketla. “Via!”

“Ke mabapi le Tebatšo! Ke a tseba gore o kae,” ka goelela.

O ile a kgaotša kgato gomme a ema, a fetša a retologela go nna. “Tebatšo o fe?”

“Morwedi wa gagwe. Wa go timela,” ke ile ka hlaloša ka myemyelo.

“O a gafa, mfo? Ga ke kgolwe gore o desperate so,” o be a selekegile.

“Aowa. Ke therešo.”

Ga se ka bona letswele ge le etla goba go fihla ge ke le fase mola Ledimo a nkemeleditše. O ile a nthaga gomme madi a tsorotla go tšwa dinkong tša ka Ke ile ka goa. Baotledi ba dithekisi ba tla ka lebelo.

“Go diragalang mo?” ba ile ba goa.

“O be a leka go re ropa twenty thousand rand yela ya go lefa motho yo a ka thušago ka go timelela ga Tebatšo,” Ledimo o ile a nthaga maoto ga bohloko.

Ya ba baotledi ba bangwe ba dithekisi le bona ba di tsena. Ba ile ba nthaga bjalo ka mpša ya mokoto. Ka goa, ke ba rapela gore ba be le mogau. Ka se theeletšwa ke motho. Ledimo o be a nthaga molomo ka diputsi tša gagwe tše dikoto ge ke leka go bolela.

Go be go le molaleng gore ba be ba na le morero o tee fela – go mpolaya pele maphodisa a ntshwara.

“Hei! Go diragala eng mo? Gobaneng le bolaya motho yo wa Modimo?” Mmago Tebatšo a goelela, a batamela.

Ba ile ba ema gomme ba mo lebelela.

O ile a kwatama pele ga ka, matsogo a gagwe a phatlaletše ka go leka go ntšhireletša go bona. Motsotsong woo wa tlabego ke moo ke ilego ka emelela gomme ka tšhabiša bophelo bja ka eupša ba nkitimiša ka dipatla. Baswa bao ba bego ba tletše setrata le bona ba eta ba ba tlatšiša, ba goa, “Thibang!”

Ke kitimetše morago sethokgweng. Mohlomongwe ge ba be ba ka mmona ka mahlo a bona ba be ba tla ntheeletša. Ba bangwe ba be ba mphoša ka matlapa. Hlogo ya ka e tsorotla madi. Ka thoma go ikwa ke dukologa. Bohloko bjoo bo be bo sa kgotlelelege eupša ka se dumele gore bo mphetše maatla. Ke kitimile bjalo ka segafi eupša ba no tšwelapele ba batamela, ba goa.

Mafelelong, ke ile ka fihla rantaboleng. Mokgelo yola o be a sa le ka ntle, a le gare a topela dikgong. Ga se a ba a retologa le ge ke be ke goelela ke hloka thušo. Ke ile ka retologela morago. Baotledi ba be ba se sa bonala eupša mantšu a bona ona a tletše moyeng. Ke ile ka kitimela ka rantaboleng gomme ka tswalela lebati, pelo ya ka e rothotha.

“O ile kae?” Ke ile ka kwa ba botšišana ka tlabego, ba eme kgauswi ga monyako.

Ke ile ka phopholetša ke lebile bolaong gomme ka dula fase thoko ga Tebatšo, yoo a bego a sa dutše bjalo ka peleng matsogo a gagwe a gokere maoto a gagwe a matelele a masese. O be a thuthumela.

Ka bonako, lebati la tswinya e le ge le bulega gomme ka bona Ledimo a hloletše ka gare. Teng ya ka ya bofagana ge mahlo a rena a kopana.

“O gona ka moo?” yo mongwe wa lešaba leo a goeletša. “E le gore o dirang mo dithabeng tše tša baloi gabotsebotse?”

Ledimo o ile a nkgerula ka phatla ya go šošobana. “Aowa… Ga o na selo ka mo,” o ile a realo, a ntebeletše ka mahlo a go tuka.

Ke ile ka hemela godimo ge a retologa gomme a sepela. Mantšu a bona a felela lešokeng.

“Go diregile eng?” Tebatšo a botšiša, a phophola hlogo ya ka, matsogo a gagwe a le boleta bjale ka a ngwana. Bohloko bo ile bja oma ge a nkgwatha.

“Ga se ba ntshepa,” ka realo, ke hemelana boka mpša.

“Batswadi ba ka bona? O ba bone?” o ile a pinyeletša seatla sa ka.

“Mmago fela. Ke yena a ba šitišitšego gomme a mpha monyetla wa gore ke kgone go tšhaba. Eupša ga se ke kgone go bolela le yena. Ledimo…”

Tebatšo o ile a tlolela kgole le nna mo ekego leina leo le a mo tšhoša. Ka ipotša gore ke homole.

Ka bjako, mantšu a boa gape. Bobedi re ile ra theeletša ge lešaba le feta ba le tseleng ya go boela morago gae, ba balabala ka moo dithaba tšeo di tširošago madi a mebele ya bona ka gona.

Mafelelong, mantšu a ile a tšeelwa legato ke mešito ya maoto. Pelo ya ka e ile ya nyaka go ema ge ke lebati le bulega gomme Ledimo a thibela seetša.

***

Re botše: Naa o nagana gore go ile go direga eng morago ga mo?