Letsatsi la dikela esale motsheare bophelong ba Mpho – Hoseng ho hong le ho hong ho shebahala ho le lefifi ho yena. Ke hora ya leshome hoseng jwale empa Mpho o ntse a robetse betheng ya hae. O nahana ho seye sekolong. O ikutlwa e ka hlooho ya hae e a mo imela. Haesale a sa robala bosiu kaofela. Ha a kgone ho robala le hona jwale.

Kgafetsa kelellong ya hae o bapala ka mehopolo eo a nang le yona ya mohla a neng a ile tleliniking ho ya bolella mooki ka qeto ya hae. O hopola ha a ilo ntsha mpa, a apere diaparo tsa sepetlele tse mmala o moputswa, a ntse a thothomela ke letswalo. O hopola a robetse betheng.  Mmele wa hae o ikutlwa o bata haholo ha a sheba disebediswa tse tlo sebediswa ho yena. Ona ikutlwa eka ha se mmele wa hae. O ne a lakatsa eka a ka be a le marulelong, mme a sa kgone ho utlwa maikutlo a hae le hanyane feela. Ho ne ho ka ba molemo ha ho le jwalo.

Ka mora mehopolo eo, ke ha a aparelwa ke ho inyatsa haholo mme ka lehlakore le leng o ikutlwa a thusehile. Ke ha a utlwa lentswe ka hlohong ya hae le mmotsang hore ke hobaneng a ile a etsa sena. A pheta a ikaraba a re o ne a sena boikgethelo.

Ke ha a letsetsa Palesa. O ikutlwa e ka ho molemo a bue le motho e mong hobane mehopolo ya hae e a farasa.

“Motswalle, bophelo ba ka bo senyehile hona jwale,” o bolella motswalle wa hae.

“Ke eng motswalle”

Yaba Mpho o hemela hodimo. Ke kgale a bolokile sephiri sena. “Ke ne ke imile. E ne e le ngwana wa Tony. Ke ile ka mo founela mme ha araba mosadi. A re mosadi eo ke kgarebe ya hae. Ke ne ke sa kgone ho ka tobana le sena…ke ne neke sa kgone.

“Nana, iketle hanyane. Bua hantle hle. O mpolelle ntho e nngwe le e nngwe, o qale ho tloha qalong,” ho rialo Palesa.

“O a hopola ke ne ke o bolelle hore ke robetse le Tony? Bosiung boo ke ile ka ima. Jwale ke ile ka ya ho ntsha mpa. Ha ke a bolella batswadi ba ka. O ile a nqhekella. Ke neke sa tlo kgona ho hodisa ngwana ke le mong.” Ho bolela Mpho.

“Motswalle e kae ntja eo e o entseng ntho ee? Ere ke e fumane ntja eo ke e bolaye.” Ho bua Palesa a halefile.

“Ha arabe mohala wa hae.” Ho bolela Mpho

“Hopola hore ke teng ho o tshehetsa ha o hloka ho bua le motho. Metswalle e etseditswe ntho eo,” ho rialo Palesa.

“Re metswalle ka ho sa feleng, ha ho jwalo?” ho bua Mpho.

“E re metswalle ka ho sa feleng” ho araba Palesa.

Ka mora hore ba behe mehala fatshe, Mpho o ntse a robetse betheng ya hae. Ke ha a leka mohala wa Tony hape. Empa ha ho motho ya o arabang.

***

Phirimaneng ya letsatsi leo ke ha Mpho a kena ho Facebook. Ha a re mahlo tloha, a bona ‘status’ sa Tony. O ile a tshoha ho bona hore o se a tsamaile mona Afrika Borwa. O ile Nigeria. O kentse setshwatsho ho Facebook mme hodima sona a ngola hore ‘sala hantle Afrika Borwa…..ha le hlole le mpona…’

Ke ha mahlo a Mpho a tlala meokgo. O entse jwang na hore a be sethotho hakana. Tony o iketseditse ho yena mona. Jwale ke ha a ikutlwa a mo nyonya mme a lakatsa eka a ka be a sa kopana le yena bophelong ba hae. O ile a ikutlwa eka a ka bua le Palesa hape.

“Kgotsi, o ikutlwa jwang?” Ke Palesa eo ha araba mohala.

“Hei, Kgotsi ke a o hloka. O ka kgona hore o tle o tlo robaletsa moo lapeng?” Ke Mpho eo.

“Ah, ntshwarele hle ratu. Ke setse le bana ba lapeng. Mme wa ka o mosebetsing,” ho araba Palesa. “Empa ke tla tla hosane kapele ha ke kgona.”

“Oh, ho lokile he,” ho bua Mpho a phoqehile.

“Sala hantle kgotsi” ke Palesa eo.

“Sala hantle moratuwa,” ho rialo Mpho. Ke ha meokgo e qala ho keleketla mahlong a hae. O ikutlwa a hloka Palesa nakong ena. Ha a ka fumana Palesa mme a mo ake a ka ikutlwa ho kokobetse.

Ke ha Mpho a bea mohala fatshe mme a nka bukanyana ya hae ya ho ngola le pene. O ikutlwa moya o le fatshe.

Ke ha a qala ho ngola:

Mme le ntae. Ke entse bothoto bo boholo. Ke lahlehetswe ke bongwanana baka ho mohlankana a bitswang Tony. Ke ile ka ima. Ka fumana hore o na le kgarebe mme ha a batle ntho e kopaneng le nna ka mora moo. Ke ntshitse mpa hobane ke ne ke sa tsebe hore ke etse jwang. Sena se nkimetse maikutlo. Ke tlo fedisa bophelo ba ka. Kea tshepa le tla utlwisisa. Ke kopa le ntshwarele.

Ke ha a mena lengolo a le beha tafoleng ya hae. A nto leba diphateng ho robala, a ikutlwa a hatsetse ke pelo e bohloko. Qetellong a ba a robala.

***

Re bolelle: Hobaneng o nahana hore ho molemo ho bolella motho eo o mo  tshepang ka mathata a hao?