Wanele nje ukungena ngomnyango uNoma, yaziphosa yonke kuye intombi yakhe. Uphose lo tyesana yakhe ebeyiphethe esitulweni uNoma, waganga uThandiwe.
“Imincili engaka yeyantoni ke ntomb’am?” uyabuza uNoma akuba uThandiwe eyekile umanga.
“Ndifumene umxeba kwinqununu yaseSiyakhula, Mama. Ngomso ndinodliwano-ndlebe nayo,” utsho uThandiwe.
“Umkhulu Thixo! Inene ungowokudunyiswa,” uthi ekhupha la mazwi uNoma abe echiphiza iinyembezi ehlala phantsi.
“Ungaxhalabi ntomb’am. Zinyembezi zovuyo. Ndizakukhe ndilale ubuthongo obehlayo. Ndivuyiswa nayile nto yokuba ubizwe sisikolo esilapha kufuphi,” utsho uNoma.
UNoma xa onwabile, uyalila. Ukanti naxa ekhathazekile, uyalila. UThandiwe uyamazi unina ukuba unje nto nje akade amqhele. Unxunguphala oko xa unina elila.
Uzikhabe ngentsimbi yesixhenxe iingubo uThandiwe walungiselela ukuya eSiyakhula. Lithe libetha icala emva kwentsimbi yethoba wabe esenqweleni eya esikolweni. Ungene nje emnyango wangqala kwigumbi elinombhalo othi “Ulwamkelo”.
“Mholo, ndinguThandiwe Velani igama. Ndinodliwano-ndlebe noNqununu uJobela. Bendicela igumbi endinokumfamana kulo,” utsh
o uThandiwe.
“Jika ekunene uza kubona ucango olunobmhalo othi “Nqununu Z Jobela”. Phambi kokuba ufike kuwo, kukho isitulo eside. Chopha kuso umlinde ngoba usenolunye udliwano-ndlebe,” imphendula isalatha ekunene le ntokazi.
“Ndiyabulela,” utsho uThandiwe
Uhambile uThandiwe wafika walinda apho kweso situlo ebeyalelwe ukuba achophe kuso. Uthe akufika singenamntu wanethemba lokuba bambalwa abantu ababizwe kolu dliwano-ndlebe. Ulinde nje imizuzwana engephi kwaphuma ityendyana lomfana. Libulise uThandiwe lityhilekile xa lidlula ngakuye. Uye waqala waxhalaba uThandiwe akaqaphela noNqununu uJobela ome emnyango olindele ukuba angene ngaphakathi.
“Awuzanga kudliwano-ndlebe, Nkosazana?” Uyabuza uNqununu ebudinwa. Ubambe ucango ngesandla sasekhohlo, ngesinye isandla ubambe usiba lokubhala.
“Uxolo Nqununu. Ewe, ndize kulo,” utsho exhuma uThandiwe ukuya kwigumbi likaNqununu uJobela.
Emva kokuba bebuzene impilo, uNqununu uJobela ucele uThandiwe ahlale esitulweni. Iye yahlala kwesayo inqununu bajongana noThandiwe. Phakathi kwabo kukho itafile enamaphetshana nencwadana ekubonakalayo ibibhala kuyo inqununu. Amehlo kaThandiwe ahamba igumbi lenqununu ngokukhawuleza. Emva koNqununu uJobela, edongeni, kuxhonywe isatifikethi semfundo yakhe ephuzulu. Nayo inqununu le, isidanga sayo isifumene apho uThandiwe ebefunda khona. Nangona yona yasifumana uThandiwe esancanca ibele.
“Ndicela undixelele kabanzi ngawe Nkosazana Velani,” utsho uNqununu uJobela emjonge ntsho uThandiwe.
Lo mbuzo kudala ewubuzwa xa ekudliwano-ndlebe kodwa intliziyo usayiva ibetha ngakuqhoqhoqho xa kufuneka ewuphendule.
“Igama lam ndinguThandiwe Velani, ndizalelwe ndakhulela kwilokishi elapha kufuphi, eMasiphumelele. Amabanga am aphantsi ndiwafunde eZwelethemba, aphezulu ndawafunda eKhulani apho ndithe ndagqwesa khona kwizifundo zeziBalo. Ngenxa yokuba kudala ndakuthanda ukudlulisa ulwazi, ndabona kundilungele ukwenza izifundo zokuba ngumfundisi-ntsapho. Isidanga ndisithwele kwiminyaka emibini edlulileyo nto nje andikafumani thuba lokuba ndiqeqeshe abantwana,” utsho uThandiwe.
UNqununu uJobela unyusa amashiya ajonge kwisicelo somsebenzi awayesifakile uThandiwe akuba etshilo ukuba zange waphangela oko wathwala isidanga.
Khawusixelele: Wakhe wayibhala i-CV? Ngeziphi iinkcukacha ekubalulekileyo ukuba zibekhona?