Lešata la ditagwa tšeo di tlogago di ikhoretše ebile di opela ntle le go kgathala ka selo di le gare di hlahlaregela gae ga se seo se tsošitšego Doris. O tlwaetše mašata le dipolelo tša gare ga mpa ya bošego tša matagwa. Seo se mo tsošago borokong bja gagwe bjo bogolo ke lešata la go thuthupa la go tšhoša, moo ekego gona le selo seo se fišwago ebile gona le mašata a pelaelo.

“Abantwana bam!” Doris a goelela a fofa ka lebelo go tšwa malaong, a topa kaone ya gagwe ya bošego tseleng ya go tšwa. Bana bona ba hwile ka boroko ka phapošing ya mabapi. Na ke eng sa go thuthupa ka lešata la go tšhoša bjale? Gona go reng go no thoma go fiša bjale mola e le marega?

“Maki! Maki vuka! Ku yasha!” moagišani a goelela.

Ka maikutlo a gagwe ao a bego a nyogile, le madi a gagwe a kitima, a bula lebati la khwitšhing gomme a hlakanetšwa ke mahloko. Mokutwana wa Charles ke fela kgabo ya mollo gomme batho ba kitima gohle, dipakete di le ka matsogong. A topa pakete ya leteka ya dilitara tše masomepedihlano ya meetse a go nwa ao a a beago ka khwitšhing gomme a tšwela ka ntle go yo thuša, a tswalela lebati la gagwe.

“Mama!” mošemane wa gagwe yo mogolo a goelela a eme lebating.

“Dula ka ngwakong o hlokomele bana beno!” a goelela. “Ke a boa gona bjalebjale!” a tlaleletša mola a tšeka ka kota yeo e swerego keiti.

“Charles o kae?” a goelelela godimo a bolela le moagišani wa gagwe ka gare ga hlakahlakano yeo e le ge bobedi ba tlolela morago go phefa kgabo yeo e bego e lauma. Mokutwana wa moagišane yoo a bego a agile  ka morago o be o le kotsing ge ba ka se phakiše. Gabjale go be go šetše go kgobokane badudi ba Phumolong bao ba ka bago ditatsene tše pedi. Bontši bja basadi ba be ba lebeletše ka letšhogo ge Doris le mogwera wa gagwe Ntombi ba leka go thuša ka go laola kgabo yeo e bego e lauma.

“Uphi uBra Charles?” lesogana le lengwe la botšiša le lebile pakete ye nngwe ya mabu goba meetse, seo a se hwetšago pele. Ka morago ga seo se kwalago eke diiriiri tša toro ye tšhošago, kgabo ya fetša e timilwe. Mošidi o be o khupeditše seripa sa ka ntle sa mokhukhu woo o kilego wa phadima.

Moragonyana a gore kgabo ya mafelelo e tingwe, le maikutlo a go imologa a boa, lentšu la tšwelela lešabeng leo le bego le phatlalala gore Charles a ga gona Freedom Square. Go kwala a tlogile moo šebining lebakeng le e ka bago diiri tše pedi. Doris le Ntombi ba lebelelana ka letšhogo gomme ba retologela mmogo go mašaledi a mokhukhu woo o swelego ka pele ga bona. Basadi bao ba ba bedi ba ile ba topa lesela la kgale mmogo gomme ba leba khoneng ya mokhukhu yeo e lego karolo ye nngwe ya phapoši ya Charles ya borobalelo. Monna yo mongwe a ba goelela “Boang! Go sa fiša kudu moo!”

Doris, a ihlokomologiša lentšu leo la go se tsebege a goeletša “Piet! Thabo! Sizani! Ke nagana gore o ka mo gare!”

Ba sa ihlama ka selo ge e se fela ka mašela a kgale a ditšhila, dipete le dikepi basadi bao ba babedi le banna ba bangwe ba bararo ba kgona go hlomola le lengwe la masenke ao a bego a fiša go tšwa koteng yeo e bego e sa eme. Monna yo mongwe a kgona go leba lebating la tshipi gomme a le bula a le ka gare, muši wa thunyetša ka ntle.

“Bra Charles! O mo kae?” motho yo mongwe a goeletša.

Ba bangwe ba be ba tseba gore ge e le gore ke nnete Charles o be a sa le ka moo gare, phologo e no ba fela ditoro. E rile ge bontši bja muši bo tšwile le phišo e fokotšegile, madi a sa bela ka ditšhikeng tša gagwe le letšhogo le tletše lentšung la gagwe, Doris a rapela banna bao ba babedi gore ba boele ka gare ba yo fetleka thotobolo.

E rile ge basadi bao ba babedi ba neneketša mmogo kgauswi ga lebati ka disakatuku tšeo di bego di bipile melomo le dinko tša bona, ba hlolela ka gare. Sehlopha se segolo sa batho se be se kgobokane, ka ge lentšu le be le phatlaletše gore Charles ga a hwetšagale. Dikotikoti tša go hloka selo le fenišara ye nnyane yeo e bego e šetše ya kwala e šutulošwa. Yo mongwe wa basadi a kwa monna yo mokopana go bale ba babedi a ngunanguna se sengwe ka sepontšhe ebile a bitša mongwe ka yena gore a batametše thotšhe.

“Hai!” banna ba babedi ba betotša.

“Yini?” Doris a goa ka letšhogo a bula lebati gomme ba goga maoto ba lebile pele, Ntombi a kakatletše letsogo la gagwe. E rile ge ba kgonne go šušumela gare ga banna bao gabjale ba bego ba homotše, gona fao, khutlwaneng go be go šošobane setopo sa mešidi. Ntombi a hlaba mokgoši wa go tsenelela tsebeng, matsogo a gagwe a ngaparetše doek yeo e bego e le hlogong.

“Charles?” Doris a realo a kwatama ka dikhuru a tloga a sa kgolwe.

“Charles! O reng ka mosadi wa gago le bana? Gobaneng Charles? Gobaneng?!” o ile a sekišana le setopo sa go hloka bophelo.

E rile ge letšhogo le legolo le aparela basadi bao ba babedi banna bale ba ba rwalela ka ntle ga mokutwana.

Ba rile ge ba tšwelela, diatla e le tše disodiso, difahlego di tlotše mešidi, Doris a emiša mahlo a gagwe ao a tletšego meokgo gomme a hlakanetšwa ke sefahlego sa Phumlani seo se bego se tshwenyegile. Sefahlego sa mmagwe sa netefatša dikgolo, eupša a palelwa ke go amogela seo. A kitimela moo matopeng a mokhukhu ka phišegelo, eupša Doris a tlolela go yena ka nako. Mathomong a leka ka maatla ka moka go itokolla diatleng tša mmagwe, a goelela “Malume! Malume!” eupša Doris a mo kgwahliša a mmeile sehubeng sa gagwe, a mo thibela go bona seo se ka mo pokelago bophelo bja gagwe ka moka.

Ka meokgo yeo e bego e keleketla sefahlegong sa gagwe a theeletša, ntle le thušo, ge mošemane a lla mo ekego ke mathomo a lla bophelong bja gagwe, a sekhumola nako le nako mola a kgorametše mmagwe ka go leka go ikhomotša. Selo sa mafelelo seo a gopolago a se kwa ke lešata leo le fokolago la disaerine leo le tšwelelago kgojana, di latetšwe go ka phološa motho.

***

Re botše: Naa karolo ye e go makaditše?