Ka moragonyana Phumlani o kwa mantšu ao a tlwaelegilego le lešata la keiti ya Uncle Charles e bulega. Ke matlagosa ge Charles a emišetša bagwera ba gagwe letsogo go ba laela, a šobathile pala ya go sekama ya terata ya go anega diaparo kgauswi ga keiti ya gagwe.

“Okay gents…” sesekhu. “Le hlokomele…” sesekhu- sesekhu. “…MaZondo. Mabarebare a re a ka ba…” sesekhu. “… a itukišetša go tšwa gabjale,” Charles a konkoretša. Bagwera ba gagwe ba sega, ba theoga tseleng ya manyokenyoke a magolo a go dira gore go be boima go akanya gore ke neng moo ba ka naganago go tšeka.

“Sharp Charlie!” yo mongwe wa bona a goelela.

“Phola my bra,” Velaphi a dira lešata.

Phumlani o hlodimetše ka ntle ka lefasetere la phapoši ya bona ye nnyane ya go robalela a šikinya letsogo a tloga a imologile moyeng ka uMalume. Seetša se segolo seo se lego lefastereng sa go hlolwa ke lebone le legolo la setrata leo le kganyetšago mmotwana wa bona ka moka le be le swanetše goba le dira gore go be boima gore uMalume a kgone go mmona go tšwa ka mola jarateng. Go bula lebati a goelela “O robale gabotse Malume!” ga se kgetho le ga nnyane ka nako yeo. Ka go kgotsofala gore uBab’ Velaphi o phethile tshepišo ya gagwe gomme a buša Uncle Charles gae, Phumlani a boela gape malaong, ebile a ikhurumetša ka tšubete ya borutho, a bea thapelo ka setu ya go leboga gomme a ya ka boroko ka lebaka la molapo.

Charles a retologa a leba lebating la gagwe la ka pele, eupša go ema ka go otlologa ya ba mathatha. Ntle le temošo maatla a kgogedi a mmuša fase lefaseng. A betha fase ka sefahlego pele ka gare ga serapana sa Buhle, a nyakile go timelela ka gare ga matlakala a morogo wa dithaka wa go naba. A patlama moo lebakanyana, a leka go goga moya ebile a lebogela le go tonya ga mabu ao. Morago ga gore a somiše terata bjalo ka sekokotlelo go mo thuša go ema, ebile a kgopela tshwarelo go matlakala a morogo ao gabjale a bego a gatakilwe, a feleletša a kgonne go tsena ka gare.

“Eish… Buhle a ka se ntshwarele ka se…” sesekhu “tshenyo ye ke e dirilego serapana sa gagwe” a ngunanguna.

“Aretse,” a šikinya magetla. “Se ke bophelo!” a sega.

Ka matsogo a go thuthumela, Charles a kgona go tšhuma lebone la parafene gomme a ema gannyane e le ge a khunama kgara ya gagwe e thoma go ba bohloko kudu. A leka go ema thwii gape, a šobathile kgara ya gagwe ka letsogo le tee mola a phophola ka laiking a nyakana le dihlare tša gagwe ka le lengwe. A kga meetse ka tšeke ka gare ga pakete ya pente gomme a nwa dipilisi tša gagwe.

“No more!” sesekhu. “Ke feditše ka…” sesekhu “bjalwa.”

Ka bjako “Iyoooo…” a šinyalala e le ge a thulela lebone leo le tukago fase, a hlahlaregela ka phapošing ya bolago. Ka morago ga gagwe kgabo ya mollo ya latswa le go tšhuma kgareteini yeo e nyakilego goba ye tšhweu. Papago bana ba babedi a wela fase, a pshikologa ka mokokotlo. Poifo yeo gabjale e lebanego le yena, ge a le gare a palelwa ke go hema, ke kgabo yeo e bego e binabina e golela godimo ka bonako e le gare e latswa, e fetola le go fediša sengwe le sengwe mahlong a gagwe. Charles a leka go goeletša ka phišegelo a nyaka thušo, eupša bohloko bja mo tima lentšu.

***

Re botše: Naa o nagana gore Charles o tla phologa kgabo ye ya mollo?