Ḓuvha ḽa ṱano ḽo swika. Khaya o ima a songo ḓigeḓa na luthihi nga murahu ha tshitsiro; u ita a tshi ṱodzimela thangana ya murole i tshi khou ṱana vhukoni hayo afho siṱeidzhini.
“Zwoṱhe zwo dzudzanyea! Noṱhe dzhiani madzulo a vheiwe, ndi tshifhinga tsha uri ramakone a dzhene zwino,” avho ndi Vho Rowland, vha tshi khou lidzalidza minwe yavho.
Khaya a ṱodzimela gogo ḽa vhathu, a vhona Thando na vhabebi vhawe fhaḽa kha vhudzulo a phanḓa. U vha vhona hawe zwa ita uri a pfe a songo tou dzudzanyea tshoṱhe.
“Ndi tshifhinga,” hu amba Vho Rowland, vha mu kuḓa uri a dzhene.
Khaya na lugwada lwawe vho ima henefhano murahu ha tshitsiro. Mavhone oṱhe fhaḽa siṱeidzhini a tsima, ha sala ho nzwinzwimala. Gogo ḽa vhathu ḽa fhumula.
Ha thoma dziḽa bithi dza muzika wa hip-hop, musi tshitsiro tshi tshi khou tsiruluwa, na mavhone a tshi khou funga oṱhe.
Gogo ḽa huvha mihuvho ya ṱhuṱhuwedzo musi vhatshini vha tshi thoma vhuṱolo havho, vha tshi ṱanganya siṱeidzhi tshoṱhe. Vhatshini vha phaḓalala, vha dovha vha ṱangana huthihi vhukati ha siṱeidzhi vha tshi edzisela vhalwi vha nndwa ya zwiṱaraṱani. Ha pfala miludzi na khuwa ya ṱhuṱhuwedzo u bva fhaḽa nga vhathu vho ḓadzaho holo iyi. Musi vhathu vha tshe vho sedza vhukati, Khaya a suvhasuvha a nyamalala kha khuḓa a ya ngei murahu ha siṱeidzhi he a ri u swika a rwela nga zwiḽa zwiambaro zwine a tea u zwi ambara a tshi ita mitshino yawe a eṱhe.
Musi Khaya a tshi khou khwaṱhisa thambo dza zwienda zwawe zwa mutshino wa baḽethe, o ḓiwana a tshi khou ṅweṅwela uri ḽia ḓuvha ḽo swika.
* * *
Khaya o ima vhukati ha siṱeidzhi ngomu swiswini ḽihulu, a tshi khou thetshelesa vhaṱaleli vha tshi khou amba zwine ha khou kona u tou zwi pfa zwavhuḓi. O lugela u tshina: mulenzhe wa tsha uḽa u phanḓa kha wa tsha monde, tshanḓa tsha monde tshi muyani, tshiṅwe o tshi takusa zwiṱuku nyana nga matungo.
Vhone ḽa tshedza tsha tshitangaledzi ḽa vhonetshela!
Vhathu vhoṱhe vha fhumula.
Mubvumo wa luya luimbo lu no pfi ‘Ave Maria’ wa ḓadza holo yoṱhe.
Mulenzhe wa tsha u ḽa, ratha! a fhufhela muyani, a mona e muyani; a vhuya e ratha nga matungo ha siṱeidzhi. U khou zwi pfa uri vhathu vho mu sedza. Mbilu yawe i kha ḓi rwela nṱha vhukuma. A mbo humbula uri vhabebi vhawe vha hone afho holoni; a ḓivhudzisa uri ndi mini zwine vha zwi elekanya ngae na mutshino.
Khaya a sunyela fhaḽa vhukati ha siṱeidzhi ngeno vhone ḽi tshi khou mu tevhela. Hezwi luimbo lu tshi yela magumoni alwo, Khaya a ḓilugisela u fhufhela nṱhanṱha sa zwiḽa musi a muloroni wawe. A femela ngomu, a ri fhufhi!
Luthihi.
Luvhili.
A mona.
A tshi vhuya fhasi, a khotha gona ḽawe, zwiṱuku nyana, na zwenezwo a vhuya fhasi lwa vhugwaimane.
O zwi kona.
Gogo ḽa vhathu ḽa vusa khuwa ya bembela, hu tshi rendwa ene Khaya. Hezwi musi vhathu vha tshi fhedza u vhanda zwanḓa na u renda, ha sala muthu muthihi a tshi khou vhanda zwanḓa. Swiswi ndi ḽihulu u vhona uri uyo muthu u ḓo vha e nnyi. Fhedzi musi mavhoneguṱe a tshi fungiwa, Khaya a zwi vhona uri ndi khotsi awe vhane vha khou vhanda zwanḓa, khofheni havho hu na u ṅweṅwela hu bvaho mbiluni yavho. Khaya a kotamisa tshifhaṱuwo tshawe, miṱodzi ya ḓadza zwikamba. Vhatshini vhoṱhe vha ḓa vha imavho na Khaya afho siṱeidzhini. Vhoṱhe vha kotamisa zwifhaṱuwo, vhathu vha fhululedza hafhu.
* * *
Khaya, vhabebi vhawe na Thando vho ima henefho luvhanḓeni nga ngomu holoni, vho ḓala dakalo.
“Munna! No ntsumbedza vhukoni. No ita mutshino u mangadzaho,” ndi Thando a no ralo, a tshi khou mu kuvhatedza.
Na mme awe vha mu kuvhatedza. “No shuma ṅwananga, zwo vha zwo nakesa,” vha ralo.
Khaya a ṱharamudza tshanḓa tshawe uri a khaḓe khotsi awe; vhone vha mu sedza lwa tshifhinga nyana, u bva afho vha mu kokodza vha mu kuvhatedza lwa maṱhakheni.
“No ita zwi mangadzaho, mutukana wanga. No shuma,” vha a mu fhululedza.
Khotsi a Khaya a vho ngo vhuya vha vuwa vho vha muthu wa u kwamea muyani vha kona u zwi sumbedzisa. Fhedzi u kuvhatedziwa ngavho lwa tshihaḓu zwo ita uri Khaya a pfe o mangala, nahone zwo mu sia o takala.
“Hu na zwe ra ni ḓela nazwo,” ndi khotsi awe.
Mme awe vha dzhenisa tshanḓa tshavho begeni, tsha vhuya na DVD iḽa ya ‘Step Up’, vha mu ṋekedza yone. Khaya a fhufha nga dakalo, a kuvhatedza vhabebi vhawe.
Vho Rowland na vhaṅwe mufumakadzi vha sendelavho.
“Khaya, ndi tama u ni ḓivhadza kha muṅwe muthu vha ndeme. Hoyu ndi Cynthia u bva Dance Academy.”
“Dance Academy – vha amba tshiḽa tshi no wanala London?” Khaya u a vhudzisa.
“Ee, ndi zwavhuḓi u ṱangana na inwi. Mudededzi waṋu vho mmbidza uri naṅwaha ndi ḓe ndi ṱalele ṱano – vho fhulufhedzisa uri ṱano ḽi ḓo vha ḽi ḽa maṱhakheni nahone ḽo ḓala vhukoni – nahone hezwi ndi tea uri ndi zwi ambe, nṋe ndo takalela zwe na ita ṋamusi. Ndo funesa mutshino waṋu musi ni noṱhe. No vha ni tshi khou ita zwa nṱhesa.” U ralo a tshi khou ṅweṅwela.
“Wow! Ndi khou livhuwesa.” Khaya u vhonala o mangala.
“Hu takala nṋe. Zwino ni ḓo vha ni tshi zwi ḓivha uri ṅwaha muṅwe na muṅwe ri ṋea vhagudi u bva mashangoni oṱhe tshikhala tsha u guda kha akhademi yashu. Nga thendelo yaṋu ngomu hazwo, ndi tama u ni topola nda isa dzina ḽaṋu kha vhananguludzi uri ṅwaha u ḓaho vha sedzevho na dzina ḽaṋu.”
“Nṋe, uhm, wow …. Nṋe ngoho a thi ḓivhi uri ndi nga ri mini. Ndo xelelwa nga maipfi.” A rembuluwa a sedza Thando na vhabebi vhawe, a wana vha tshi khou ṅweṅwela vho mu sedza.
“Itani zwine mbilu yaṋu ya khou ṱoḓa zwone, mutukana wanga,” hu amba khotsi awe.
“Eya! Eya! Nṋe uno ndo takala! Eya!”
“Ndi zwavhuḓi!” ndi Cynthia a tshi tendelela nga ṱhoho. “Ni ḓo tea u dzhenela kha dziodishini, fhedzi ri ḓo amba zwinzhi zwenezwo, kana nga tshifhinga tsha tshiswiṱulo. Ṱanganedzani garaṱa yanga ya zwidodombedzwa zwa vhukwamani, ni mpfounele uri ri tendelane uri ri nga ṱangana lini.”
Musi Cynthia na Vho Rowland vha tshi khou ṱuwa, Khaya a pfa a tshi khou kundelwa u ḓifara. A thoma u fhufhela nṱha na fhasi. O vha a sa zwi humbuli uri zwi no nga sa izwi zwi nga itea. Zwoṱhe zwi pfala sa ḓembe kha Khaya. Muṱa wawe na Thando vha mu kuvhatedza. Hezwi o tangiwa nga ṱhuṱhuwedzi ya lushaka ulu, Khaya a limuwa uri zwine zwa khou bvelela kha vhutshilo hawe a si muloro, fhedzi ndi hone u ranga u vuledzea a bono ḽawe.
Ri vhudzeni vhuḓipfi haṋu: Ni nga ṱahisa vhuḓipfi haṋu nga nḓilaḓe malugana na nganea iyi?
