Kona usibutjubutju mntfwane bantfu;
Lipenjisi lelibovu tju lombhala.
Inhlitiyo yami lencumile uyincibilikisa ngekumamatseka nje kuphela.
Imamatseka nje, kufanele muntfu lomuhle;
Ingani icabuka lutsadvo lwakho loluchichima ngalenkhulu
Imfudvumalo.

Wayikitata idvumatekile inhlitiyo yami,
Iphephetela kuhle kweliphepha liphephuka;
Wayiphipha ,wayiphuphutsa yate yalulama.
Namhla songayiphika kutsi ngiyo lebeyimunyu
Kuhle kwemlaza;
Ingani ingcebelekile, etandleni takho letim’nene

Ngikutsandza kwendlula tiNtsaba takaMaseko.
Likhiwa lami lelihle lengalikhelelwa nguMveliqcanti.
Somahlaya wami longitsintsa emanonini, ngigegedzeke ngivete lekugcina.
Lalela la ke sponono sami,
Ngiyatiqcabha ngawe yeva!