Elikayise nelendodana
Mina ngiyalisaba elikamoya uma sesifa ngomoya
Ukufa kuhamba nomoya
Kunhlanga zimuka nomoya noma sesivale amakhala
Sithi sivika ukufa okuhamba ngomoya

Kuwa izinsika zemindeni
Zisishiya zilandelana
Ukufa kuqotha imbokodo nesisekelo
Nkosi sisikelele

Lemphefumulo esishiya singakashayi iskhathi
Isishiya siphuke umoya
Sibe singakwazi nakuwuphefumula umoya
Ngiyabona kuzogcina kuyicala ngisho ukuphefumula
Sesohlala sibambe umoya

Thina sesifana nabafile sihamba
Ngicela ningimbeleni igodi
Ngibone igumbi lami lokugcina amaqaphelo ami esasebenza
Ngicela labo engibonile bangithethelele
Sakhula abazali bethi umhlaba usuyasongwa
Okubi ukuthi usongwa ngathi
Usongwa singakaphili ngisho ingxenyana yempilo esasiyibekelwe

Sesincishwe ngisho ithuba lokuzibongela kubazali bethu
Kuba ukuphazima kweso
Mhlasimbe namhlanje nami ningibona okokugcina
Impilo isimfishane
Ngisho umtwana ozelwe ubukeka emude kunempilo

Mina ngiyalisaba elikamoya
Kakade kwathiwa ngeke sisabhubha ngamanzi
Yingakho namhlanje sincishwa ukuphefumula
Umhlaba ususongwa ngomoya