“Ngoho a hu na ṅwana we a fulufhedzea kha muṱa wawe u fana na ṅwana wa ṅwananga Mulanga. Vha a ḓivha ngoho o ngita muthu vhukati ha vhathu.” Ndi mukegulu Vho-Aḽilali vho tou navha na milenzhe henefho muṱani.

“Vha kha ḓi amba zwa u itwa muthu fhedzi-fhedzi? Ndi khou ri miḓi yoṱhe heyi ya muvhundu wa Madzhatsha vha laya vhana vhavho ngae hoyu Mulanga,” hu ḓadzisa Vho-Tshiambwa.

“Vha kha ḓi zwihumbula uḽa musi hu tshi ḓa muṱhannga wa mutshena afha o ḓa u humbela uri Mulanga a vhe nyabikani wawe nda tou pfuu sa goyo?” Ndi Vho-Aḽilali.

“Ah! Inwi vhone zwino vhone vha ri muthuso wa mukhuwa vho vha vha tshi ḓo u wana ngafhi arali ṅwana a farwa nga misho ya hawe?” Ndi Vho-Tshiambwa.

Mulanga e kha ṅwedzi wa vhuṱanu na vhuraru wa u fhedzisela e ngei gudedzini ḽawe ḽa vhudokotela, a mbo ḓi dzudzanyelwa vhuṱambo vhuhulu nga Musanda Vho-Khedzhi Ṋemadzhatsha, vha mudzhia a vha muṱanuni wavho wa dzekiso sa izwi e mukololo.

“Zwino ha ngo vhutumba vhuhadzi-hadzi? Khouḽa na zwino a nga ḓi vhofholowa tshifhinga tshiṅwe na tshiṅwe nga uri hafhu zwino miṅwedzi yo no ḓi tandulukana i tshi ya e muthu wa thovhela?” Ndi Vho-Aḽilali.

Vhathada vha tshi kha ḓi amba vha vhona mimoḓoro kheyi ya Musanda i tshi khou dubisa buse i dzhena nga khoro. Khathihi fhedzi vothi ḽa uyu moḓoro une wa vha phanḓa ḽi tshi vulwa ḽa tevhelwa nga zwiambaro zwa Mulanga.

Vha tshi kha ḓi ri kani-kani, vha vhona na ene Mulanga a tshi kho tsitswa kha moḓoro, zwanḓani o takula lukhanzwa lwa Mutshena, ṅwana wa Briton uḽani we a hanelwa a tshi mu mala.

Ri vhudzeni: Khuḓano vhukati ha sialala zwi tshi ḓa siani ḽa dzekiso na vhutshilo ha ṋamusi ndi ine i nga fheliswa nga nḓila-ḓe?