Nga hafha kha thungo ya tsha u ḽa ho vha ho ima vhafunzi Vho-Khwidzhili, nga hafha kha thungo ya tsha monde ho ima vha muṱa wa Ha-Malimiṱhohwana, nga fhaḽa-vho murahu nyana ha vhafunzi ho ima vha muṱa wa Ha-Mbageḓi.

“Havha vho imaho hafha phanḓa ndi vhana vhe nda tou alusa henefha kerekeni. Musundwa ene a thi tsha amba, ndi ene ane a vula gathe ya kereke Sondaha iṅwe na iṅwe,” ndi vhafunzi Vho-Khwidzhili.

Musi vhafunzi vha tshi ralo, kereke yoṱhe i vhanda zwanḓa ho ḓala madakalo na maseo vhatendi vha tshi khou tikedza havha vhavhili vhane vha khou ḓi dzhenisa kha phaṱhutshedzo ya mushumo wa mbingano.

Musi vhafunzi vha tshi ri vha ambe lwa vhuvhili, Musundwa a mbo ḓi bva kerekeni sa gulu ya tshigidi o thivha mulomo nga tshanḓa tsha u ḽa.

“Musundwa mulandu waṋu ni tshi vho golola, hai mani inwi no pfukiwa mani.” Ndi Vho-Ḓora mme a Musundwa hezwi vho no vha nnḓa.

Ngomu kerekeni, vhafunzi Vho-Khwidzhili vha amba na tshivhidzo, vha ri: “Hai vhathu ni songo mangala. Musundwa o dzhenwa nga nyofho nga uri ṋamusi ndi ḓuvha ḽawe.”

Musi mme na ṅwana vho no vhuya hafhu kerekeni, mme vha amba. “Vhafunzi kha vha ḓo nkhadzima khudzaipfi ndi na zwine nda khou tea u vhudza tshivhidzo.”

Vho no fara khudzaipfi nga tshanḓa: “ Hovhu vhuṱambo ho guma henefha. Musundwa o ḓi hwala nahone zwi na miṅwedzi miraru zwino ndi khou amba. Muṋe wa heyi mihwalo ndi henevha vhafunzi vhaṋu Vho-Khwidzhili.”

Ri vhudzeni: Vhathu ro vha fulufhelaho zwi a konadzea uri vha ite zwithu zwi no mangadza zwine zwa dovha zwa ri vhaisa?