Ha fhela miṅwaha na miṅwaha mvula ya na i tshi pfula. Zwidulo zwa vhangwa hu tshi lodzwea matshilo a vhathu vha zwivhalo.Venḓa ḽa bvuma hu tshi pfi Venḓa hu ya viiwa. Hu hone vha tshi lwela zwidulo. Zwa dzulwa nga vhana na vhaḓuhulu vhaṋe vhazwo vho dzondolola maṱo vha tshi lilela ngomu.Vhadzuli vhazwo vha ḓi lovha vha tshi tou sielana.Vhomaine vha tshi amba ha ḓi pfi vho tou rengwa.
Vhadzimu vha sinyuwa vha tshi vhona vhathu vha shango vha kha muḽano u si na musi. Zwikona na madomba zwa lila thavhani vha tshi ḓi ri Venḓa ḽi ḓo vha na mulalo.Vhana vha bebwa, zwi sa athu bonyolowa maṱo vhabebi vha somba mikulo; vhaṅwe vha tou laṱwa maḓakani. Ha vha hu hone mulalo na vhuthu zwo pfuluwa shangoni.
Izwo zwoṱhe zwi tshi itiswa nga u sa vha na murangaphanḓa wa vhukuma.Vhaṋe vha zwidulo vho dzula vho muma milomo vha tshi shavha u miliswa tshivhindi. Ingoho zwiḽiwa zwi tshi vha zwo shelwaho milimo ya mifudafuda. Hune vha kanda hone vha tshi sedza vha wana vho salwa murahu sa zwiḽani mmbwa i tshi salwa murahu nga mutshila wayo. Hu hone vho vha salaho murahu vha tshi ri ri ṱoḓa u vhona vho sudzuluwa kha ḽino, vha tekutshelwa vhudzulavhafu.
Ngamurahu ha tshifhinga tshilapfu, vhadzimu vha ḓamuni na vha ṱhohoni vha sinyuwa tshoṱhe, vha dalela vhaṋe vha tshidulo vha vha vhudza mafhungo maḓifha a u wana vhuhosi havho murahu. Kuḓuhulwana ko bebwaho kwo tetshelwa u kha khosi kwa tsireledzwa kwa vhuya kwa aluwa; kwa vhehwa tshiduloni tsha vhomakhulukuku.
Ndi afho hu tshi vuwa luambo vhaṅwe vha tshi ri a ri vhusiwi nga ṅwana we a tou bebwa maṱoni ashu. Khadzi khulwane ya vhidza muṱangano wa mphaso; ha shelwa fola fhasi, vhadzimu vha takala, Venḓa ḽa lala hafhu; hu hone ḽo alamelwa nga mulalo na vhudziki. Dzikereke dza vulwa, vhavhulahi na zwigevhenga vha rembuluwa, vha ḓivha Mudzimu. Musanda ha ḓi dzulela u vha fhethu hu dzulaho ho ḓala vhana hu hone vha tshi tamba mitambo yoṱhe.
Vhakalaha na vhakegulu vhe vha tshi amba vha ri khosi iyi yo dzhenaho yo ṱamba kule na shango. Izwo vho zwi bula vha tshi vhona zwivhuya zwi alamaho shangoni ḽine a vhusa khaḽo. Maḓi aḽa a milamboni a vha one a shumaho u ṱamba saizwi hu tshi vho kiwa maḓi avhudi Musanda.
Ingoho vhuhosi vhu vhanga u lwelwa fhedzi vho bebelwaho u vhusa vha ḓivha zwine shango ḽavho ḽa ṱoḓa. Zwino tshe vhaṋe vha zwidulo vha dzhena, shango ḽo lala saizwi vhadzimu vho takala. U viiwa ha vhathu ho tumuwa; na tshiḽiwa tsha badani u a doba wa isa mulomoni muya wau wo vhofholowa.
Kha ri ambe: Ndi zwifhio zwine na nga amba zwone ngamurahu ha musi no fhala ḽinwalwa ili?
