Ndithetha ngenzwakazi emanz’andonga
Isimomondiya sentombi
Intle intombi ka nantso
Okwe guzu liphum’ekhasini
Nqwa neyasebhelema imvumi lizwi limyoli
Ncumo ngathi loluka blankethi
Ncumo ngathi umnka nomsinga
Ubuhle balenzwakazi butshal’umdla kwabanonzi
Xa bedlula kuy’abafana babeth’umlozi
Uyobeva bathi dudlu ntombazana
Ndicel’ukwenza umamekhaya
Ndivumele ndikuphath’okosana
Lo ntliziyo ndiyiphath’okwe qanda
Ndiyi nzwana Ndicel’ukwenza eyam inzwakazi
Aphaphazela amabhabhathane esuswini
Suka wavuma umntwana
Kanti loomazwi amsa kwantshabalala
Ngathi yibhola yombhoxo benikelana ngay’abafana
Yangu nam sendisuka nawe ambozivela
Wayinkomo yoxhwitha ingulo ezenzela
Bayidlakaz’intliziyo yangumdliva esidlangalaleni
Suka bamtyabeka ngahlabayo amagama
Yanga angathi vuleka mhlaba ndingene
Watsho esofelweyo wathi Akwabe kwabe sekukwabekile
Eyakhe intliziyo beyophulile
Ibele sele lwaphukile nomphefumlo sele uxhelekile
Ubuhle balenzwakazi
Buyifake konzulu umsele
Emgxobhozweni sele yeyele…