Ngizigoqa phakathi kombhede nodonga. Ngizama ukuhlanganisa isiketi sami, ngimboze isikhumba sami. Ngizama ukuzilungisa kahle njengowesifazane osemusha, hhayi njengesilwane esihlatshiwe.
“Ngiyabonga, bhuti,” ngizwa ephaseji. Ngiyabonga? Ngimangazwa ukuzwa lokho kuphuma emlonyeni omkhulu wesilo, ngiqaphela imithetho yabantu yomusa.
Njengoba uDavid ebuya ngisukuma ngima ngamadolo, ngidonsa ingilazi ephukile kuhlaka lwefasitela. Angiphili. Angizwa buhlungu kodwa ngithola izwi eliluhlaza, elincengayo ngaphakathi kimi. Manje nginawo amazwi. “Ngisize!”
UDavid uyangithuka, “Vala umlomo doti!”
Ungiphakamisa ngamakhwapha, ungidonsela emuva. Uthola amandla emzimbeni wakhe ongcoliswe ngugwayi, ungihudulela kwelinye igumbi elingumakhelwane. Ungilahlela phansi esimendeni: uvala umnyango ‘wekamelo’.
Phansi kupendwe ngombala ophinki okhanyayo. Izindonga zingumbala osalamuni. Imibala ka-asikhilimu.
Uphinki wezingulube. Igazi ligcwele izinyembezi.
UDavid ukhiya umnyango ‘wehhovisi’, uphuma ngephaseji. Izigi zakhe zihamba naye, ukuyoshona ngale kwephaseji. Ngilala phansi kumbala ophinki oxexebukayo. Ubuhlungu beminwe yami buphaphamisa ingqondo yami. kuzama ukungena kwimizwa yami. Ngigqolozele isikhumba esidabukile. Ngicosha ucezu lwengilazi. Ngibheke isithombe sami ngihleka emkhukhwini wethu. Ngibona indodo yasekholishi kasisi wami, isibambo siyabonakala kwisithombe.
Angikwazi lokho Babalwa. Ngikhohliwe ukuthi ungubani.
Kodwa ithemba elisemehlweni wentombazane esesithombeni, ukukhanya okungaqinisekile kuyangivuselela. Uyiwele elijabulile, hhayi mina, kodwa ungidonsa njengozibuthe. Ngithinta igundwane, ngishiya isinindo segazi. Ngisula isandla sami esiketini sami esinemithende. Ngichofoza uphawu le-Skype. Ngithayipha igama le-Skype likasisi wami. Xola Busi 27.
UXola wangiyisa emsebenzini wakhe ukuze angibonise indlela esebenza ngayo. “Imahhala, Babalwa. Bheka”
Ukhuluma nomphathi wakhe uKanelo nge-Skype, osemkhukhwini we-inthanethi. Uyahleka, ‘Heyi lolu akulona olunye uhlangothi lomhlaba.
” Kodwa uchofoze uphawu oluhlaza okotshani ukuze angibonise. Kuvela ubuso bukaXola kusikrini. “Heyi, sisi,”
Kodwa manje akasaphenduli. Kungenzeka usekhaya.
Konje ngubani igama likaKanelo? Cabanga, Babalwa! Cabanga!
Ngiyathayipha, Kanelo Cybershack. Ingabe isizinda sakhe leso?
Igazi liyaconsa futhi kwigundwane. Ngiyalisula.
Ucingo lwe-skype lukhala sengathi amabhamuza amakhulu, okusaketshezi. Ngislayidela phansi inkinobho yevolumu. Ukukhala kuma ngokushesha. Kuvela ubuso bukaKonela, ecwebezela amafutha, mhlawumbe ngenxa yosuku olude, olushisayo. Ngibeka isiketi emabeleni ami.
“Kanelo. Ngi…”
Izwi lami liyama, lifuna ukuphuma sengathi amanzi amaningi, aphumele emnyango, kodwa ngilungisa umphimbo wami. “Ngidlwenguliwe.”
UKanelo udonsa ubuso ngenxa yokumangala.
“Isitaladi i-Joubert. E-Brixton. Ibhilidi … izitini ezibomvu.”
Izwi lakhe liphezulu, lidonseke kakhulu. “Kunombolo bani?”
Ngiyaqhikiza. “Mhlawumbe ezitezi sesithupha.”
Izwi lami liyashona ngaphakathi kimi, angisakwazi ukwenza umsindo.
“Qhubeka Babalwa, yini enye?” Uzwakala ephelelwa ithemba. “Iseduze nani?” Manje uyamemeza. “Iseceleni kwani?!”
Ngizwa izigi zisondela ngokushesha, ukuhamba ngokuthukuthela kukaDavid eza ejele lami.
Ngidonsa ilephuthophu, ngigibela esitulweni esibi. Ngiphakamisela phezulu ekhanda lami ilephuthophu. Ngidonsa intambo ize ifike ekugcinenei, ngibhekisa isikrini kufasitela elincane, eliphezulu odongeni. Izingalo zami ziyaqhaqhazela njengoba ngibhekise ihlo eincane lekhamera kwizinsimbi zefasitela la okukhona khona umama othandekayo. Ingabe ukhanyiswe amalambu ezitaladi?
“Uyabona?” Ngifuna ukubuza uKanelo, kodwa nginesikhathi sokuhlala phansi etafuleni, ngichofoza inkinobho ebomvu. Ngiphume ku-Skype.
Ngishona phansi. Igundwane liyashelela phansi etafuleni, lilengela phansi. Ngiyajika, sengathi angenzanga lutho, njengoba uDavid etheleka ephethe okokunamathisela iphakheji nepulasitiki emnyama.
“Wenzeni kukhompuyutha?” engithethisa.
Ngilungisa ubuso bami sengathi ngimangele. “Kungani ungibuza?”
Uthukuthele, “Ibheke olunye uhlangothi!”
“Ungiphushele kuyo,” ngisho, sengathi angiso isithakazelo.
Uqalaza igundwane elilengayo. “Uyisebenzisile sifebe ndini!”
Ngiyahleka. Ngathi intombazane engiyizwe ekuqaleni. Umsindo ohohozayo, omunyu. “Angikaze ngithinte leyo nto ekuphileni kwami.”
UDavid uyangikholwa.
Uvula umnyango wekamelo, uvala imbobo yefasitela eliphihlizekile. Ufaka ipulasitiki emnyama ohlakeni lwefasitela. Ulokhu ekhipha amagama njengoba esebenza, angiqalaze ngaphezu kwehlombe lakhe. “Kudingeke ukuthi nginike ikhasimende isephulelo semali. Imali okumele ikhokhele leli fasitela eliphukile uma unenhlanhla. Kodwa uyangikolota, mabhebeza. Ithikithi yebhasi, imali uLiwa akuphe yona. Uzosebenza uze uncame, uyangizwa? Uzokhokhela ukudla kwakho. Uzokhokhela indawo yokuhlala. Uma ulwa, intengo yakho iyehla. Uzobe ususebenza nakakhulu.”
Ulalisa okokunamathisela ngesandla sakhe. Izwi lakhe liyaphakama. Ngizokuphathela okuthize okuzokwenza kube lula. Amaswidi amnandi.”
“Angiwafuni ‘amaswidi wakho’.”
“Awuwafuni?”
Nginikina ikhanda lami.
Ulahlela phansi okokunamathisela, ukuyeka kuginqike. Ukhipha isibhamu ekhukhwini lakhe. “Manje…”
Usikhomba ebusweni bami. Umbhobho wesibhamu ukhula kabili njengamehlo wami.
Ngibuyela emuva. Asikho isidingo sokuthi aqedele umusho wakhe. Kancane ushutheka isibhamu kwibhande lebhulukwe lakhe. Ubuyela kwipulasisitiki yakhe emnyama, udabula okokunamathisela ngamazinyo wakhe. Uyayinamathisela.
Ngiyathikazeka njengoba esondela ngakimi.
***
Sitshele: Empeleni ayini ‘lamaswidi’? Kungani uDavid efuna ukuthi uBabalwa asebenzise ‘amaswidi’?