“Baba thuma mina”

“Thuma mina ngiyokusebenzela ephasini”

“Ngiyotjhugulula ubuphilo babantwana bakho”

Kutjho wena ngaphambi kobana ubelethwe kuleli phasi.

Ukhohliwe ngesivumelwano owasenza noMdali?

Lapho wamemeza bekwatjha ilwizi lakho uthi “ngikhona Baba, Thuma mina!”

Ukhohliwe na? Ukuthi nguwe owazikhethako ukuthi ufuna ukubuyela ephasini ukuyolungisa imitjhapho owayenzako.

Ukhohliwe ukuthi nguwe owatlikitla Isivumelwano, sokubamkhanyo ebumnyameni, kungekho awakukhomba ngesibhamu ukuthi wenze njalo.

Ukhohliwe bonyana nguwe owasikhidlha isililo, urabhela bona kube nguwe othunywako.

Nangembala ukhohliwe, nangendlela uphila ngayo.

Ngendlela usududa ngayo ebumnyameni, ulahlekelisa labo awathi uzobakhanyisela.

Ngembala ukhohliwe ngombana ngitjho naye uZimu ngeze usamkhomba.

Ngitjho nalo leli Zulu obuyakilo,

Sekumnyama ebusweni bakho.

Ukhohliwe bona khewaba lingilozi elithembekileko eZulwini?

Ukhohliwe ngemikariso emihle bowuzenza eZulwini?

Awukhumbuli litho?

Ngembala ukhohliwe.