Bana ba motho ba ngwathagana hlogo ya tšie
Ntwa ga go lwe manaba, go lwa baratani
Segagešo se re a le re go tšwa molomong la rereša
Ngwana phoša dira ga a bolawe
Lerato ke sejo se monate go etša todi ya lee
Inelang diatla meetseng, ditshwarelo di fihlelelwe
Ratanang lena bana ba mpa ba go šielana letswele
Ratanang le phumulaneng meokgo, dikgopi di fele
Go bose bjang ge bana ba motho ba ratana
Go thakgatša mahlo le ditsebe bjang ge bana ba motho ba ratana
Ba kgathalelana ebile ba kwelana bohloko
Ba phumolana meokgo ge dipelo di le bohloko
Ba ngwathelana lekotwana la tšie ba tlatša dimpa
Go bose ge bana ba motho ba ratana
Lehufa le tshwelwa ka mare
Ge mogeno a atlega thaba le yena
Ge mogešo o atlega se nyenye ngwaneno
Go bose ge bana ba motho ba ratana
A re rataneng