Ngiyanizwa!
Nith’okuhlul’amadoda kuyabikwa.
Ngicela niwuhlabe niwulawule,
ngilayeleni lapho kubikwa khona
okuhlula amadoda.

Ngiphen’ikheli lamahhovis’akhona.
Nemombolo yocing’uma ninayo ngiyoyithokozela.
Ngingesikhahlamezi,
Ukhahlamezekil’umoya wami.

Ngehla ngenyuka nemithwal’engabonwayo.
Ngingqongqoze yonk’iminyango,
Ngibuye ngilambatha nemithwalo yami  ngazikhoth’amanxeba,
maqede ngalala ngenxeba,
Ngath’uMdal’uzowapholisa  lamanxeba .

Ngiyile kwa ndaba zabantu,
kuvele kwafana nokuya kwami kosonhlalakahle.
Nobulungiswa bengalo yomthetho
buyinsumansumane uqobo lwayo.
Nabaluleki bezengqondo bangishiye
notalatiya lokhwantalala.

Imizamo yami yokuthol’usizo
Iphelel’eboyen’okwezithukithuku zenja yephisi.
Bengilindel’ukuvikelwa kwizindlavin’ezizenz’izisulu.
Bengingaz’ukuth kuyoba yimin’umsolwa.
Angith vel’amalungel’awabakhethiweyo.
Eyomphakathi ngingeyizeke ngoba yangishiya ngibamb’ongezansi.

Angithi nababulali bakababa baphila kuwo lomphakathi.
Kant’uban’onendaba nami?
Ngilayelen’umvikeli wamadoda,
Ngiboniseleni ngomkhulumeli wamadoda.

Ivangeli lokuhlukunyezwa kwezingane

nabesifazane lizwakele,
ngamalungelo bavikelwe,
wathint’imbokodo
Usufak’iscelo sokulal’ubaliwe.

Ngabe ngiyakhala manje ngesab’ihlazo
Indoda kayikhali,ikhalela ngaphakathi.
Ukukhala kwami
kuzongenz’inhlekis’emphakathini.
Nasemaphoyisen’indod’aynalungelo.
Kush’uhulumeni weth’ochemileyo.

Ukufela ngaphakathi,
Kungiphendul’imfa kabili okomkhovu.
Ningabona ngihleka,ngaphakathi

ngikhihl’esikaNandi.
Kuningi engikubulele ngaphakathi kimi,
Ngiyokhala kuzwe bani mina ndoda?

Leyandunduma, ithuna,

Kulapho ngangcwaba khona

konk’okuphelelis’umuntu.
Ngasala ngiyigobongo lomnenke.

Njengetsh’elingenamizwa ngizophila.
Mihla namalanga ngiduva idadamu
Kwesam’isiziba sezinyembezi.
Inhlamb’ifel’emanzini,
kulesiziba esingaphili nhlanzi nangwenya,
Akukho mpilo kugcwel’umunyu,
Kancane kancane ngiyabisha kulolusizi.

Inkunzi isematholeni, namuhla kukhihlwa esikaNandi ngokuwa kwayo ngophondo.
Ayikhombisanga zimpawu zobuntekenteke,
Bonke bebethi yindoda emadodeni.
Sisazoqhubeka nokufel’amacala amadod’esingawazi.
Kakade zifa ngamvunye,
Bathi vel’amadod’ayefana.