Go tshelwa ke kgwedi go bose kudu ka ge o nyaka lesea

Ke ile ka thakgala, ka myemyela le ge ke robetše

Ka re leo lesea ke bego ke sepela le bonkadingala, baporofeta le tšona dingaka tša Sekgowa

Ke sa lokelwe, lehono gona Modimo a tla a kwa sello sa ka,

Ke fela pelo ya go ya madibeng go bona seo Modimo le badimo ba mphilego sona

Ke le yo mobotse ke retwa ke batho ka moka, ele ge e nthatile mpa ya lesea

Ke opša ke hlogo bošego le mosegare ke ngwala maina a makgarebe le masogana

Mme ke kgetha leo elego molotšana wo mobosana tsebeng tša ka

Ke eja se se boa, ke leka sela se dumela

Ke robala boroko bjalo ka lesea leo le sa tšwago go belegwa

Ge ke tsoga ke no bona le hlabile ka mokgwa wo ke bego ke kgotsofala ka gona

Tša sepela dikgwedi tša go hloka swele

La thoma lešoko la go sega bjalo ka thipa ya borotho

Ka leba bookelong, ka thušwa

Ka kwa sello se se bosana sa lesea leo ke bego ke le nyaka

Ka goeletša godimo ka re ke a leboga Modimo,

Ka išwa ka mo go lego  batswetši ba bangwe

Ka fiwa ngwana a ntšhitše mahlwana a go phadima bjalo ka naletšana

Tshehlana ya mmele, yena ngwanaka wa mathomo, yena wa go tliša lethabo ka gae

Ka mo amuša lebele a myemyela mahlo a tswalela

Ka re o robetše, ka thoma go bethwa ke letswalo

Ka bitša baoki, ba hwetša selemo e le ngwagola

Le ile badimong lesea laka!

Ka re kgane ke a lora ka bona ba sobelela le yena

Ke ile ka hlapa ka meokgo

Ka re gora gore yo ga se wa ka, wa ka Modimo o tla mpha

O tlogetše lebadi pelong ya ka, efela le ge motho a ka se tsoge a phumotšwe

Lehono ge ke bolela ke arabilwe gape

Tšohle di sepela ka thelelo

Modimo ke yo mogolo!