Ngifun’ ukuzwa kunjani…,
Ukuthi kunjan ukusuka la emhlabeni!
Ngindizele phezul’ esibhakabhakeni,
Ngifun’ ukushayw’ umoya
Ngoba la kwelikaMthaniya ziyabuya!
Ngifun’ ukundiza nazo zonke izinyoni zezulu:
Ngifun’ ukundiza namajuba…!
Won’ abusw’ ubumnene, uthando nokuthula.
Ngoba emhlabeni kumapeketwana
Isikhuni sesibuya nomkhwezeli!
Ngifun’ ukundiza nokhozi…!
Lona olungahlali namnyevuzi alinamkhozi
Lona eliyibon’ iseza lè ingozi
Lizakhele isidleke phezul’ emadwaleni
Ngoba la emhlabeni kukhon’ oklebe,
Abaphilel’ ukuhlwith’ izinto zabanye.
Ngoba la emhlabeni kukhon’ amaqola,
Wona aphilela ukuqola abanye.
Uyisebenzela kanzima into,
Bona bayithathe nje ngozipho.
Ngifun’ ukuzindizela namalanda…!
Ukuphuma nokushona kwelanga,
Wona ayalandelana awanasimanga.
Wona angodokotela bezinkomo,
Ngoba bagqok’ ezimhloph’ izembatho
Angifun’ ukundiza nesikhova…!
Ngoba ngisab’ imisebenzi yobumnyama.
Angifun’ ukufel’ into engingayazi,
Bangibulale bathi ngithunywe umthakathi!
Kanti angifun’ ukundiza namalulwane!
Ngoba ngiyinyoni noma ngiyigundane, angizazi!
Ngithand’ impilo eqondile nemsulwa
Angifun’ ukundiza namanqe
Won’ aphilel’ ukuzulazula ahluph’ abanye
Aphila futhi asizakala ngent’ ezifele
Angiyithand’ leyo mpilo yokukhathaz’ abanye
Angifun’ ukundiza namagwababa…!
Ngoba wona athand’ izindaba,
Lezi axoxelwa zona uma echobana.
Ngifun’ ukundiza namahlokohloko!
Ngoba awazwani nobusika kodwa nehlobo.
Ihlobo nehlobo ayafuduka nje wonk’ umhlaba
Nami ngifun’ ukujikeleza wonk’ umhlaba.
Ngifun’ ukundiza ne-Fish eagle…!
Ngifun’ ukundiza nama-Seagulls …!
Njengawo ngifun’ ukusuthiswa izinhlanzi zolwandle
Ngifun’ ukundiza nothekwane …!
Won’ angakugizi qakala abantu bathini ,
Bayawuhleka bathi mubi .
Wona uyazazi, uyazethemba uthi muhle!
Mami ngimuhle noma bethi ngimubi
Ngifun’ ukuzindizela noncede…!
Ngibe mncane kodwa ngihlakaniphe
Ngifun’ ukundiza nezinyoni zezulu
Ngiziphilele ngokuziculela izingoma,
Ezenanela injabulo nokuthula enginakho
Ngikhohlwe izinkinga zalo mhlaba
Ngifun’ ukundiza…!
ibhalwe ngu:
Sthembiso Sydney Msezane