Mntanomuntu uthando luyivelo
Namehlo aphiwa ukubuka.
Inhliziyo izisikela la ithanda khona
Ayibheki ukuthi unani esibayeni nasephaketheni.
Uze ungixolele, ungixolisele nakubazali bakho
Ngokuthi ngikuthande kodwa ngibe ngingenalutho.
Ngizamile ukukuziba ngehluleka
Inhliziyo ingiqulisa amacala, ngibamba imhlangan’engapheli.
Ubuhle bakho bangidonsa ngiqala ukukubona
Nendlebe zam zalobizela ukuzwa iphimbo lakho.
Iphimbo lakho elimtoti labhala incwadi kweyami inhliziyo
Ngayifunda njengoba isibhaliwe ukuthi wena uwuyena udokotela ophethe injabulo yenhliziyo yam.
Mangibone wena ngikhohlwa yikho konke ukuhlupha inhliziyo yami
Nokuthi anginalutho ngikukhumbula ngoba nakhu ngingakuboni.
Elam iphupho elokuthi uhlale usemehlweni ami
Ngiswele wona amandla ngaba sengikuthathile.
Ungixolele ngokukuthanda nam angizenzanga
Ngenziwa yilenhliziyo ethi uma ibona wena ijabule.
Wena ungothandiweyo wami kweyami inhliziyo
Noma bangangeqela abanamandla ngithi lapho sengithole amandla ziyokhishwa ezinye.
Eseyishayile akakayosi, oseyosile akakayidli
Oseyidlile udle icala, kusho mina ngifunga amawethu ngithi insizwa edlula mina iyanuka.