Naa o bonwa ke mang?
Meriri e na le mebala e lesome.
Botelele bja yona bo bjalo ka
Noga e le meetseng a elang nokeng ya Tubatse
Sefahlego se tloditšwe ka tša sebjalebjale.
Bobotse bja sona ke bja lebakanyana,
Ge lapa la go kgophiwa le foforwa ke pula,
Ke mo o bonago mmala wa lona.
Naa o bonwa ke mang?
Diroko di re mponeng.
Ruri ke sego sa go šitwa go tshela
Bjala bja badimo.
Go inama eba seipone sa balego
Kgauswi le wena.
Naa o bonwa ke mang?
Ge o sepela o re mponeng,
Ruri ke go bona moeta le legapa di
Kgokološwa ka mafori.
Naa o bonwa ke mang?