A ke nyake go wela pitšeng tša batho,

Ke sa ikemišetša ebile ke sena maikarabelo,

Ke etša mosadi yola maloba a hladilego,

Monna wa gagwe a šala a swere mafofa,

Bana ba šala nyanyeng dikgopolo di fiša.

Ke nyaka nako ya go ikgopola bjalo ka kgarebe,

Ke tsebe gore ke nyaka eng bophelong bja ka,

Ke go amogele gore ke tlo phela le wena bophelo ka moka,

Ke tsebe gore le ge re kopana le mathata ke tla a emela,

Ke tsebe  gore le lapeng nka ba molala ka le thekga.

Ka madimabe gabjale ke nyaka nakonyana,

A ke na nnete ya gore nka ba wa gago wa palamonwana,

A ke na nnete ya gore re tsebana bokaone,

Ke ra go tsebana ka gare le ka ntle,

Ke ra maitshwaro le semelo.

Sello sa gago se nkweša bohloko,

Ke duma ge nkabe ke kgona go amogela,

Gore o ka mpha lerato leo ke le nyakago,

Mohlomongwe re be re ka thaba mmogo,

Madimabe ke gore nka se kgahlwe ke selo ge go etla nyalo.